धनगढी । धनगढीमा भएको निसर्ग अस्पताल टेकबहादुर चोखाल स्मृति कपको उपाधि वडा नम्वर ५ स्टार सिटी क्लबले जितेको छ । पूर्वमन्त्री स्वर्गीय टेकबहादुर चोखालको सम्झनामा धनगढीमा आयोजना गरिएको निसर्ग अस्पताल टेकबहादुर चोखाल स्मृति कपको उपाधि वडा नम्वर नम्वर १ फारवेष्ट पशुपति युवा क्लबलाई ७–५ ले हराउँदै वडा नम्वर ५ ले जितेको हो ।
विजेता भएसंगै वडा नम्वर ५ स्टार सिटीले नगद ३० हजारसहित ट्रफी मेडल तथा उपविजेता वडा नम्वर १ फारवेष्ट पशुपतिले १५ हजार नगद सहित ट्रफी मेडल पुरस्कार प्राप्त गरेको छ । यसैगरी उत्कृष्ट गोलरक्षक वडा नम्वर ५ का सुशिल पाण्डेय, उत्कृष्ट खेलाडी वडा नम्वर १ का भिष्म भाट र सर्वाधिक गोलकर्ता वडा नम्वर ५ का कमल देउवा भएका छन् । उनीहरुलाई नगद एक–एक हजार सहित ट्रफी, मेडल पुरस्कार दिईएको छ ।
धनगढी उप–महानगरपालिकाकी उप मेयर सुशिला मिश्र भट्टको प्रमुख आतिथ्यतामा भएको समापन कार्यक्रममा पुरस्कार वितरण गरिएको हो । टेकवहादुर चोखाल फाउण्डसनका अध्यक्ष विनय चोखालको अध्यक्षतामा भएको कार्यक्रममा पब्लिक मिडिया नेपालका अध्यक्ष श्रवण देउवाले स्वागत मन्तव्य राखेका थिए । अखिल नेपाल फुटबल संघका केन्द्रिय सदस्य प्रकाश विष्ट विशिष्ठ अतिथि रहेको कार्यक्रममा स्वर्गीय टेकबहादुर चोखालकी धर्मपत्नी कल्पना चोखालको पनि उपस्थिति रहेको थियो ।
पब्लिक मिडिया नेपालको आयोजना र टेकबहादुर चोखाल फाउन्डेसनको सहकार्यमा प्रतियोगिता भएको हो । प्रतियोगितामा धनगढी उपमहानगरपालिका विभिन्न वडाका १८ टीमको सहभागी रहेको थियो ।
धनगढीको फ्ल्याटल्याण्ड फुटसलमा आयोजना भएको प्रतियोगिताको मुख्य प्रायोजकमा निसर्ग अस्पताल रहेको थियो भने सह—प्रायोजकमा गोर्खा व्रअरीको उत्पादन टुबोर्ग रहेको थियो ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
