कुलमान पढेको विद्यालयको भूतपूर्व विद्यार्थी समाज गठन हुँदै

रामेछाप जिल्लाको नमूना विद्यालय घोषित सुनापती गाउँपालिका–४ बेथानको कुशेश्वर माविमा अध्ययन गरेका भूतपूर्व विद्यार्थीहरुको भेला हुने भएको छ । विद्यालयको शैक्षिक र भौतिक अवस्था सुधार गर्न भूतपूर्व विद्यार्थी समाज गठन गर्ने लागिएको हो ।

विद्यालयको पहलमा राजधानी काठमाडौंमा बस्दै आएका भूतपूर्व विद्यार्थीहरुलाई एकीकृत बनाउदै सुझाव लिने उदेश्यको साथ कार्तिक ६ गते ११ बजे भक्तपुरको सानोठिमी क्याम्पसमा भूतपूर्व विद्यार्थीहको भेला हुने भएको हो । विं सं २०१४ सालमा स्थानापना भएको कुशेश्वर माविबाट हालसम्म करिब १८ सय विद्यार्थी उत्पादन गर्न सफल भएका छ । यस माविमा अध्ययन गरेका विद्यार्थीहरु सरकारको उच्च तहमा पुग्न समेत सफल भएका छन् ।

सांसद, बैंकर्स, डाक्टर, इन्जिनियर, पत्रकार, उद्योग व्यवसायी, राष्ट्रसेवक कर्मचारी, राजनीतिज्ञ उत्पादन गर्ने शैक्षिक थलोको विकासमा भूतपूर्व विद्यार्थीहरुको सल्लाह र सुझाव लिन विद्यार्थी समाज गठन गर्न लागिएको विद्यालयका प्रअ बलदेव धामीले बताए । संस्थागत रुपमा नै भूतपूर्व विद्यार्थी समाज गठन गरेर विद्यालयको अभियानमा सहयोग पुगोस भन्ने उदेश्य विद्यालयले लिएको छ । तत्कालिन शिक्षामन्त्री महाकवि लक्ष्मीप्रसाद देवकोटा शिक्षामन्त्री हुँदा विं संं २०१४ साल असार ३ गते विद्यालयको स्थापना भएको थियो ।

उज्यालो नेपालका अभियन्ता नेपाल विद्युत प्राधिकरणका कार्यकारी निर्देशक कुलमान घिसिङ, पूर्व सभासद शिवबहादुर खड्काले बेथानकै कुशेश्वर माविमा अध्ययन गरेका थिए । यसअघि विभिन्न प्रयास भएपनि विद्यालयको पहलमा यस पटक भने औपचारिक रुपमा कुशेश्वर मावि भूतपूर्व विद्यार्थी समाज गठन हुन लागेको हो । भेलामा सयौको संख्यामा भूतपूर्व विद्यार्थी, पूर्व शिक्षक र विद्यालयका शिक्षकहरुको सहभागीता हुने प्रअ धामीले जानकारी दिए ।