सैघाली खबर
काठमाडौं ,१४ कार्तिक
काठका कारण पुनःनिर्माणमा अवरोध आउन नदिन राष्ट्रिय पुनःनिर्माण प्राधिकरणले वन मन्त्रालय र अन्तर्गतका निकायलाई निर्देशन दिएको छ । मन्त्रालय, वन विभाग र टिम्बर कर्पोरेशन अफ नेपालका अधिकारीसँग सोमबार भएको छलफलमा प्राधिकरणका प्रमुख कार्यकारी अधिकृत युवराज भुसालले पुनःनिर्माणका लागि सहज रुपमा काठ बिक्री वितरणको व्यवस्था मिलाउन अनुरोध गर्नुभएको हो ।
जिल्लामा प्रमुख जिल्ला अधिकारीको अध्यक्षतामा रहने आपूर्ति व्यवस्था समितिलाई सक्रिय बनाउन र भूकम्प प्रभावित जिल्लामा घुम्ती चिरानी मेसिन स्थापना गर्ने लगायतका काम तत्काल गर्न पनि उहाँले मन्त्रालयको ध्यानाकर्षण गराउनुभयो । कार्यक्रममा मन्त्रालयका सहसचिव चन्द्रमान डंगोल, विभागका महानिर्देशक कृष्णप्रसाद आचार्य र टिम्बर कर्पोरेशनका महाप्रबन्धक राजु लौडारीले काठकै कारण पुनःनिर्माण प्रभावित हुन नदिने प्रतिबद्धता जनाउनुभयो ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
