काठमाडौं, पुस २ । हतियारसहित रौतहटबाट तिन जना पक्राउ परेका छन् । रौतहटको राजपुर नगरपालिका ३ दमारआजात चोकमा खटिएको सुरक्षा बेस फतुवाको टोलीले उनीहरुलाई हतियारसहित पक्राउ गरेको हो ।
पक्राउ पर्नेमा बाराको सुवर्ण गाउँपालिका ६ बस्ने ३७ वर्षीय उमेश्वरप्रसाद यादव, रौतहटको पर्रोहा नगरपालिका ६ लौकाहा बस्ने ३८ वर्षीय दामोदर साह र रौतहटको पर्रोहा नगरपालिका ४ पोखरीया बस्ने ६६ वर्षीय छोटेलाल साह रहेका छन् ।
भारतीय नम्बर प्लेटको मोटरसाइकलमा सवार उनीहरुलाई गस्ती टोलीले गएराति पौने आठ बजे हतियारसहित समातेको हो । कटुवा पेस्तोल एक थान र त्यसमा लाग्ने गोली दुई राउण्ड यस्तै धारिलो चक्कु, तार काट्ने औजार, पिलास, पेचकस, मोबाइल लगायतका सामग्री पनि बरामद भएको प्रहरीले जनाएको छ । पक्राउ परेकाहरुलाई अनुसन्धानका लागि सुरक्षा बेस क्याम्प फतुवामा राखिएको प्रहरीले जनाएको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
