काठमामाडौं उपत्यकाबाहिर पहिलो पटक प्रदेश सरकारले हेटौंडाबाट सवारी चालक अनुमतिपत्र वितरण सुरु गरेको छ । प्रदेश–३ अन्तर्गतको यातायात व्यवस्था सेवा कार्यालय हेटौंडाले शनिबार प्रयोगात्मक परीक्षा लिई सवारी चालक अनुमतिपत्र वितरण गरेको हो ।
हेटौंडा कार्यालयले सेवा सुरु गरेसँगै सवारी चालक अनुमतिपत्रको लागि वीरगञ्ज वा काठमाडौं धाउनुपर्ने बाध्यता टरेको छ । अनलाइन फाराम संकलन गरी बिहीबार लिखित परीक्षा लिएको यातायात व्यवस्था सेवा कार्यालय हेटौैंडाले शनिबार प्रयोगात्मक परीक्षा लिई अनुमतिपत्र वितरण गरेको हो ।
मंसिर ३० गतेदेखि अनलाइन फाराम संकलन सुरु गरेको कार्यालयले बिहीबार पाँचसय २० जनाको लिखित परीक्षा लिएको थियो । जसमध्ये प्रदेश सरकारअन्तर्गत हेटौंडामा स्थापना भएको कार्यालयले गत वर्षको माघ महिनादेखि सवारीको नवीकरण, दर्ता, रुट इजाजत, पटके सेवा, सवारी अनुमतिपत्र नवीकरण सुरु गरेको थियो ।
नयाँ सवारी चालक अनुमतिपत्र वितरणको लागि भने आवश्यक प्रक्रिया पूरा गर्दा केही ढिलाई भएको यातायात व्यवस्था सेवा कायालय हेटौंडाका प्रमुख पोषण थापाले बताए । लिखित परीक्षा एवम् प्रयोगात्मक परीक्षाको लागि आफ्नै संरचना निर्माण भइनसकेकाले तत्काललाई निजी क्षेत्रसँग ट्रायल सेन्टर भाडामा लिएर नयाँ सवारी अनुमतिपत्र वितरणको काम सुरु गरिएको थापाले बताए ।
प्रदेश ३ सरकारमातहत आएका काठमाडौं उपत्यकामा रहेका ८ वटा यातायात व्यवस्था सेवा कार्यालयले पूर्ववत रुपमै सवारी अनुमतिपत्र वितरणलाई निरन्तरता दिइरहे पनि उपत्यकाबाहिरको कार्यालयबाट भने पहिलो पटक हेटौंडाबाट सवारी अनुमतिपत्र वितरण सुरु गरिएको हो । प्रदेश ३ अन्तर्गत रहेको चितवन सेवा कार्यालयले भने अझै अनुमतिपत्र वितरणको काम सुरु गर्न सकेको छैन ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
