काठमाडौँ । भारतीय प्रधानमन्त्री नरेन्द्र मोदी र उनका पाकिस्तानी समकक्षी इमरान खान काठमार्डौंमा आमने सामने हुने सम्भावना देखिएको छ । काठमाडौं आयोजना हुन लागेको सगरमाथा संवाद फोरममा ती दुई देशका प्रधानमन्त्री एकैपटक सहभागी हुने अवसर जुट्ने सम्भावना देखिएको हो ।
परराष्ट्रमन्त्री प्रदिप ज्ञवालीले सो कार्यक्रमबारे अन्तरराष्ट्रिय सञ्चारमाध्यमका प्रतिनिधिलाई विस्तृत जानकारी उपलब्ध गराउने आयोजित कार्यक्रममा भारतीय प्रधानमन्त्री नरेन्द्र मोदीलाई नेपाल भ्रमणको निम्ता पठाइसकिएको बताएका छन् । यद्यपि, नयाँदिल्लीले त्यसको जवाफ फर्काइनसकेको बताए । यस कार्यक्रममा पाकिस्तानका प्रधानमन्त्री इमरान खानलाई पनि आमन्त्रित गरिएको छ।
सरकारले सो फोरममा भाग लिन छिमेकी, दक्षिण एशियाली राष्ट्रहरु, बिमिस्टेक, ठूला तथा जलवायु परिवर्तनले असर पारेका पर्वतीय र साना सामुद्रिक टापुका मुलुकलाई संवादमा सहभागी हुन आमन्त्रण गरेको छ ।
नेपालमा पहिलोपटक हुन लागेको विश्वस्तरको उक्त संवादबारे जानकारी दिन तथा नेपाल भ्रमण वर्षको समेत प्रवद्र्धनात्मक प्रचार गर्ने उद्देश्यले सरकारको निमन्त्रणामा नेपाल भ्रमणमा रहेका भारतका वरिष्ठ पत्रकारहरूको टोलीलाई सगरमाथा संवाद कार्यक्रमको आयोजना, औचित्य, सहभागितालगायत विषयबारे जानकारी गराइएको छ ।
नेपालले आयोजना गर्न लागेको यो सम्मेलनमा पछिल्ला वर्ष निकै गहिरो द्वन्द्वमा फसेका भारत र पाकिस्तानका सरकार प्रमुख आमन्ने सामन्ने हुनसक्ने सम्भावना रहेको र यो भेट दक्षिण एसियाको राजनीतिक र कुटनीतिक मञ्चमा निकै अर्थपूर्ण रहेको भन्दै भारतीय सञ्चारमाध्यामहरुले टिप्पणी गरेका छन् ।
प्रत्येक दुई वर्षमा आयोजना गरिने पहिलो संस्करणको संवादको शीर्षक ‘जलवायु परिवर्तन, पर्वतीय वातावरण र मानव जातिको भविष्य’ रहेको छ । परराष्ट्रमन्त्री ज्ञवालीले पाकिस्तानका प्रधानमन्त्री इमरान खान लगायत सबै सार्क देशका नेताहरुलाई आमन्त्रित गरिएको जानकारी दिएका छन् । यदि नेपालको निमन्त्रणलाई स्वीकार गरेर भारत र पाकिस्तानका प्रधानमन्त्री सो कार्यक्रममा सहभागी भए उनीहरु दुवैजनाको भेट हुने निश्चितप्रायः छ ।
पर्वतीय मुलुकहरू र सामुद्रिक टापुका मुलुकमा जलवायु परिवर्तनको प्रत्यक्ष चपेटामा पर्दै आइरहेका, उच्च अवस्थितिका कारणले हिन्दूकुश हिमालय जस्ता उच्च पर्वतमालामा जलवायु परिवर्तनको असर पृथ्वीका अन्य क्षेत्रमा भन्दा चाँडो र तीव्रगतिमा परिरहेको यथार्थ मन्त्री ज्ञवालीले सुनाए ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
