सैघाली खबर नुवाकोट ,१२ मंसिर
प्रदेशसभा तथा प्रतिनिधिसभा सदस्य निर्वाचन अन्तरगत आइतबार भएको मतदानमा नुवाकोटमा ६७ प्रतिशत मत खसेको छ । जिल्ला निर्वाचन कार्यालयका अनुसार दुई लाख आठ हजार एकसय ९१ मतदाता मध्ये आइतबार सम्पन्न मतदानमा एक लाख ३९ हजार ७ सय ६१ मतदाताले मत दिएका छन् ।
निर्वाचनमा कुल खसेको मत ६७.१४ प्रतिशत रहेको जिल्ला निर्वाचन अधिकारी जनार्दन अधिकारीले जानकारी दिनुभयो । यसअघि वैशाखमा सम्पन्न स्थानीयतहको निर्वाचनमा ७४.९० प्रतिशत मत खसेकोमा अहिलेको निर्वाचनमा त्यो भन्दा करिब आठ प्रतिशत कम मत खसेको हो ।
आइतबार भएको मतदानमा प्रतिनिधिसभा सदस्य क्षेत्र नं. १ मा एक लाख पाँच हजार २ सय ८७ जना मतदाता रहेकोमा ६९ हजार ८ सय ६४ मतदाताले मतदान गरेका छन् ।
यो ६६.३६ प्रतिशत रहेको निर्वाचन कार्यालयका प्रमुख अधिकारीले जानकारी दिनुभयो । प्रतिनिधिसभा सदस्य क्षेत्र नं. २ मा एक लाख दुई हजार ९०४ मतदाता रहेकोमा ६९ हजार ८ सय ९७ मतदाताले मतदान गरेका निर्वाचन कार्यालयले जनाएको छ ।
प्रतिनिधिसभा सदस्य क्षेत्र नं. २ मा खसेको मत ६७.९२ प्रतिशत रहेको छ । मतदान गर्नेमा पुरुषको सङ्ख्या ७३ हजार एकसय ९७, महिलाको सङ्ख्या ६६ हजार ५ सय ६३ र एक जना तेश्रो लिङ्गी समेत रहेका छन् ।
यसअघि निर्वाचन कार्यालयले आइतबार सम्पन्न मतदानको प्रारम्भिक तथ्याङ्कमा ६६.९८ प्रतिशत रहेको तथ्याङ्क सार्वजनिक गरेपनि त्यसमा सच्याएर सोमबार ६७.१४ प्रतिशत मतदाताले मतदान गरेको नयाँ तथ्याङ्क सार्वजनिक गरेको हो ।