निर्वाचन आचार संहिताको पूर्ण पालना गर्न निर्वाचन आयोगको आग्रह

सैघाली खबर काठमाडौं,१६ मंसिर

निर्वाचन आयोगले निर्वाचन आचार संहिता पूर्ण रुपमा पालना गर्न राजनितिक दलहरुलाई फेरी पनि आग्रह गरेको छ । पहिलो चरणको चुनाब देखि नै निर्वाचन आचार संहिता पूर्ण रुपमा पालना गर्न आयोगले दलहरुलाई आग्रह गरिरहेको छ ।

तर दल तथा उम्मेदवारले आचार संहिता पूर्ण रुपमा पालना गरेका छैनन् । निर्वाचन आयोगका प्रवक्ता नवराज ढकालका अनुसार दोस्रो चरणमा मात्रै आयोगमा १ सय भन्दा बढि आचार संहिता उल्लङघनका उजुरी परेको छ ।

प्रवक्ता ढकालले आचारसंहिता उल्लङ्घन नगर्न उम्मेदवारलाई पटक पटक सचेत गराएको तथा उल्लङ्घन गरे कारबाही गर्ने बताउनुभयो । यसैबिच, दोस्रो चरणमा हुने प्रदेश तथा प्रतिनिधिसभा सदस्य निर्वाचनका लागि निर्वाचन आयोगले खटाएको सुक्ष्म अनुगमनकर्ताले आज देखि काम थाल्ने भएका छन् ।

२१ गते निर्वाचन हुने ४५ जिल्लाका १ सय २८ निर्वाचन क्षेत्रका लागि उपसचिवस्तरका ८८ जना सुक्ष्म अनुगमनकर्ता परिचालन भएका छन् ।