काठमाण्डौँ, असार २३ कोरोना रोकथाममा सरकारसँग विभिन्न मागहरु राख्दै असार १२ गतेबाट अनशनरत ‘इनफ इज इनफ’ का अभिन्याताहरु ईशान अधिकारी ‘ई’ र पुकार बमले अनशन तोडेका छन् ।
सोमवार सरकारसँग १२ बुँदे मागमा सहमती भएसँगै मंगलवार बिहान ह्याम्स अस्पताल परिसरबाटै अनशन तोडेका हुन् ।
उनीहले पीसीआर परीक्षणको दायरा बढाउन तथा कोरोना रोकथाममा प्रभावकारी कदम चाल्नुपर्ने माग राख्दै आएका आएका थिए ।
१२ दिनअघि पाटन दरबार स्क्वायरमा अनशनरत उनीहरुको स्वास्थ्य अवस्थामा समस्या आएसँगै दुवै अनसनकारीलाई ह्याम्समा भर्ना गरिएको थियो ।
उनीहरुले अभियानका तर्फबाट बिहीबार स्वास्थ्यमन्त्री भानुभक्त ढकालसँग विभिन्न माग राखेका थिए ।
सरकारपक्ष र अनशनरत पक्षबीच सोमबार भएको वार्तामा भने दुवै पक्षबीच १२ बुँदे सहमति भएसँगै उनीहरुले अनशन तोडेका हुन् ।
उक्त सहमति पत्रमा अभियानका तर्फबाट ‘ई’ र बम तथा स्वास्थ्य मन्त्रालयका तर्फबाट डाक्टर रोशन पोखरेल र डाक्टर समिरकुमार अधिकारीले हस्ताक्षर गरेका छन् ।
यसअघि उनीहरुलाई अनशन स्थल पाटनमा भेट्न नेपाली कांग्रेसका सांसद गगन थापा, कांग्रेस केन्द्रीय सदस्य अर्जुननरसिंह केसी, जनता समाजवादी पार्टीका नेता डाक्टर बाबुराम भट्टराई लगायतले भेटेका थिए ।