सैघाली खबर
काठमाण्डौ, २५ मंसिर । नेकपा माओवादी केन्द्रका अध्यक्ष पुष्पकमल दाहालले नयाँ सरकार निर्माणका लागि अब सरकारले संविधानको मर्मअनुसारको सहयोग गर्न आग्रह गरेका छन् ।
उनले प्रेस विज्ञप्ति जारी गर्दै यस्तो बताएका हुन् । उनले भनेका छन्–“म निर्वाचन सम्पन्न गरेकोमा प्रधानमन्त्री शेरबहादुर देउवालाई पनि धन्यवाद ज्ञापन गर्दछु । अब सरकारबाट संविधानको मर्मअनुसार सहज रुपमा नयाँ सरकार निर्माणमा सहयोगको समेत अपेक्षा गर्दछु ।”
प्रचण्डलवे वाम गठबन्धनको विजयसँगै देशमा अब राजनीतिक स्थायित्व र आर्थिक समृद्धिको नयाँ युग सुरु भएको बताएका छन् । उनले यसका लागि अथक रुपमा क्रियाशील एमाले र माओवादीका नेता तथा कार्यकर्ताहरुलाई पनि धन्यवाद ज्ञापन गरेका छन् ।
यस्तो छ प्रचण्डको विज्ञप्ति
अध्यक्ष प्रचण्डद्वारा जारी प्रेस विज्ञप्ति
संविधानसभाबाट संघीय लोकतान्त्रिक गणतन्त्रात्मक संविधान घोषणा भएपछिको प्रदेश र प्रतिनिधिसभाको पहिलो ऐतिहासिक निर्वाचनमा सिङ्गो देशको उल्लासपूर्ण सहभागिता र वाम गठबन्धनलाई ऐतिहासिक अनुमोदनका लागि म देशभित्र र बाहिर रहनुभएका सबै आमाबुवा, दिदीबहिनी दाजुभाइप्रति हार्दिक आभार प्रकट गर्दछु ।
वाम गठबन्धनको विजयसँगै देशमा अब राजनीतिक स्थायित्व र आर्थिक सम्बृद्धिको नयाँ युग सुरु भएको छ । यो ऐतिहासिक परिणामका लागि अथक रुपमा क्रियाशील नेकपा ९एमाले० र नेकपा ९माओवादी केन्द्र० का देशैभरिका नेता–कार्यकर्ता बधाई र धन्यवादका पात्र हुनुहुन्छ ।
अहिलेको विजयलाई हाम्रो परीक्षा र जिम्मेवारीका रुपमा लिन र संयमपूर्वक राष्ट्रिय सम्बृद्धिका लागि थप क्रियाशील हुन म सबै वामपन्थी नेता, कार्यकर्ता र आम जनतालाई हार्दिक आग्रह गर्दछु ।
म निर्वाचन सम्पन्न गरेकोमा प्रधानमन्त्री शेर बहादुर देउवालाई पनि धन्यवाद ज्ञापन गर्दछु । अब सरकारबाट संविधानको मर्म अनुसार सहज रुपमा नयाँ सरकार निर्माणमा सहयोगको समेत अपेक्षा गर्दछु ।
ममाथि विश्वास गर्ने चितवन क्षेत्र नं। ३ का सबै मतदाताप्रति म अत्यन्त आभारी छु । आउँदा दिनमा बिना भेदभाव सिङ्गो चितवनको साझा अभिभावक बन्ने र चितवनलाई आर्थिक सम्बृद्धिको केन्द्र बनाएर समस्त राष्ट्रकै आर्थिक सम्बृद्धिका लागि क्रियाशील रहने प्रतिबद्धता दोहोर्याउँछु ।
पुष्पकमल दाहाल ‘प्रचण्ड’
अध्यक्ष
नेकपा माओवादी केन्द्र
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
