काठमाडौं। नेपाल कम्युनिष्ट पार्टी (नेकपा) को सचिवालय बैठकमा प्रधानमन्त्री तथा पार्टी अध्यक्ष केपी शर्मा ओली र कार्यकारी अध्यक्ष पुष्पकमल दाहाल ‘प्रचण्ड’को प्रस्तावमाथि छलफल प्रारम्भ गरिएको छ।
पार्टी प्रवक्ता नारायणकाजी श्रेष्ठका अनुसार प्रधानमन्त्री निवास बालुवाटारमा मंगलबार बसेको बैठकमा दुबै प्रस्तावमाथि छलफल प्रारम्भ भएको हो। अध्यक्ष ओलीले मंसिर १३ गतेको सचिवालय बैठकमा ३८ पृष्ठको ५३ बुँदे प्रतिवेदन पेश गरेका छन् भने कार्यकारी अध्यक्ष पुष्पकमल दाहाल ‘प्रचण्ड’ले कात्तिक २८ गतेको सचिवालय बैठकमा १९ पृष्ठको राजनीतिक प्रतिवेदन पेश गरेका थिए। मंगलबारको सचिवालय बैठकमा दुवै प्रतिवेदनमाथि छलफल सुरु भएको हो।
मंगलबारको सचिवालय बैठकमा अध्यक्ष ओलीले कार्यकारी अध्यक्ष प्रचण्डको प्रतिवेदन र कार्यकारी अध्यक्ष प्रचण्डले अध्यक्ष ओलीको प्रतिवेदनमाथि धारणा राखेका छन्। प्रवक्ता श्रेष्ठले पार्टीभित्रको विवाद समाधानका लागि औपचारिक र अनौपचारिक दुबै खाले छलफललाई निरन्तरता दिने भन्दै कुनै पनि हालतमा पार्टी फुट्न नदिने प्रतिवद्धता नेताहरुबाट आएको बताएका छन्।
बैठकमा अध्यक्षद्वयसँगै अन्य सचिवालय सदस्यलेसमेत धारणा राखेको प्रवक्ता नारायणकाजी श्रेष्ठले जानकारी दिए। दुवै प्रतिवेदनमाथि थप छलफल आवश्यक भएको भन्दै सचिवालयको अर्को बैठक बुधबार दिउँसो १ बजे पुनः बस्नेगरी सम्पन्न भएको प्रवक्ता श्रेष्ठले बताए। अध्यक्षद्वयको प्रस्तावमाथि घनिभूत छलफल भोलिदेखि सुरु हुने प्रवक्ता श्रेष्ठले बताए।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
