दाङ । लमहीमा जारी प्रधानमन्त्री कप महिला राष्ट्रिय क्रिकेट प्रतियोगिता (टी-२०) अन्तर्गत समूह चरणको आफ्नो अन्तिम खेलमा प्रदेश २ ले कर्णालीलाई फराकिलो अन्तरले पराजित गरेको छ ।
प्रतियोगितामा समूह चरणबाटै बाहिरिएको प्रदेश २ ले सान्त्वना जित हांसिल गर्ने क्रममा कर्णालीलाई १ सय ४३ रनले पराजित गर्यो । सोमबारको पहिलो खेलमा प्रदेश २ ले प्रस्तुत गरेको १ सय ६६ रनको विजयी चुनौतीलाई पछ्याउँदै जवाफी ब्याटिङ गरेको कर्णालीले निर्धारित २० ओभरमा ९ विकेट गुमाएर २२ रनमा सिमित भयो ।
कर्णालीका लागि ओपनर ब्याटर तिर्सना विश्वकर्माले ७ रन र आयुशा टन्डनले अविजित रहदै ४ रन जोडिन । बलिङतर्फ प्रदेश २ का लागि सरस्वती कुमारी र कविता गौतमले समान ३-३ विकेट लिंदा सन्तोषी चौधरी र आरती चौधरीले पनि १-१ विकेट लिए ।
त्यसअघि देउखुरी क्रिकेट मैदानमा टस जितेर पहिले ब्याटिङ गरेको प्रदेश २ ले निर्धारित २० ओभर पूरा खेल्दै मात्र ३ विकेट गुमाएर १ सय ६५ रन बनाएको थियो । टिमले ठूलो योगफल खडा गर्ने क्रममा उसका लागि ओपनर ब्याटर अनुराधा चौधरीले अर्धशतकीय पारी खेलिन् । अविजित रहेकी उनले ६० बलमा ६ चौकासहित ६९ रन बनाइन् ।
टिमले सुरुवाती देखिनै राम्रो सुरुवात गरेको थियो । ओपनरद्वय अनुराधा चौधरी र शोभा आलेले ६६ रनको ओपनिङ साझेदारी गरेका थिए ।
७ ओभर २ बलमा पहिलो विकेटका रुपमा पभेलियन फर्किएकी सोभाले २४ बलमा २ चौकासहित २३ रन बनाइन् । यस्तै टोलीका लागि विमला मगरले २१ रन र सन्तोषी चौधरीले ७ रनको योगदान गरिन् ।
बलिङतर्फ कर्णालीका लागि निशा पराजुलीले २ तथा सुजाता बोगटीले १ विकेट हात पारिन् । यो सँगै प्रतियोगिताको समूह ए मा रहेको कर्णालीले समूह चरणका सबै खेल गुमाउँदै प्रतियोगिताको समापन गरेको छ । यता प्रदेश नम्बर २, दुई खेलमा पराजित हुँदा एक खेलमा जित हासिल गर्न सफल भयो । यस समूहबाट लुम्बिनी प्रदेश र विभागीय टोली एपीएफ सेमिफाइनल पुगेको छ ।
एपिएफ समूह ए को बिजेता, सेमिफाइनलमा प्रबेश
प्रधानमन्त्री कप महिला राष्ट्रिय क्रिकेट प्रतियोगिता (टी-२०) अन्तर्गत समूह ए को विजेता बन्दै एपिएफ सेमिफाइनलमा प्रवेश गरेको छ ।
एपिएफले सोमबार आफ्नो समूह चरणको अन्तिम खेलमा लुम्बिनी प्रदेशलाई ६१ रनले पराजित गर्दै समूह विजेताको रुपमा सेमिफाइनलमा प्रवेश गरेको छ ।
जितका लागि १ सय २३ रनको विजयी लक्ष्य पछ्याएको घरेलु टोली लुम्बिनीले २० ओभरमा ७ विकेट गुमाउँदै ६१ रन बनायो । लुम्बिनीकी लक्ष्मी चौधरीले सर्वाधिक ११ रनको योगदान दिइन् । उपकप्तान सरस्वती पुन १० र स्वस्तिका बजागाईं ४ रनमा अविजित रहिन् ।
तेस्रो ओभरको दोस्रो बलमा सोनु खड्काले ओपनर नितु भण्डारीलाई शून्यमा बोल्ड गर्दै पहिलो सफलता दिलाएकी थिइन् । चौथो ओभरको तेस्रो बलमा रेखा रावलले कप्तान नेरी थापा मगरलाई १ रनमा कटएण्ड बोल्ड आउट गरिन् । पाँचौं ओभरको दोस्रो बलमा गिता गोसांई ४ रनमा रन आउट भईन । स्पिनर करुणा भण्डारीले सरस्वती घर्तीमगरलाई ७ र लक्ष्मी चौधरीलाई ११ रनमा बोल्ड आउट गरेपछि लुम्बिनी प्रदेश कमजोर अवस्थामा पुगेको थियो ।
स्पिनर करुणा भण्डारीले ४ ओभरमा १६ रन खर्चेर ३ विकेट लिइन् । सोनु खड्का र रेखा रावलले १–१ विकेट लिए ।
त्यसअघि देउखुरी क्रिकेट मैदानमा टस जितेर पहिला ब्याटिङ रोजेको एपिएफले निर्धारित २० ओभरमा ४ विकेट गुमाउँदै १ सय २२ रन बनायो । एपिएफकी ओपनर ज्योती पान्डेले सर्वाधिक ४९ रनको योगदान दिइन् । १९ औं ओभरको पहिलो बलमा नेरी थापाले बोल्ड आउट गर्नुअघि ५४ बलमा १ चौका प्रहार गरिन् ।
नेरीलेनै नवौं ओभरको तेस्रो बलमा ओपनर राजमती ऐरीलाई ११ रनमा बोल्ड आउट गर्दै पहिलो सफलता दिलाएकी थिइन् । इन्दु बर्मालाई कृतिका मरासैनीले १८ औं ओभरको चौथो बलमा २८ रनमा बोल्ड आउट गरेकी थिइन् । इन्दुले ३० बलमा ४ चौका प्रहार गरिन् ।
ममता चौधरी ४ रनमा आउट हुँदा सरिता मगर १० र सोनु खड्का २ रनमा अविजित रहे । कप्तान नेरी थापाले ४ ओभरमा २६ रन खर्चेर २ विकेट लिइन् । कृतिका मरासैनी र सरस्वती पुनले १–१ विकेट लिए । एपिएफ संग पराजित भएर समूह उपबिजेतामा चित्त बुझाएको घरेलु टोली लुम्बिनी प्रदेश पनि सेमिफाईनलमा प्रबेस गरेको छ ।
त्यस्तै मंगलबार बिहान सुदुर पश्चिम प्रदेश र गण्डकी प्रदेश बिच प्रतिष्प्रधा हुनेछ भने दोस्रोमा १ नम्बर प्रदेश र बाग्मती प्रदेश बिच भिडन्त हुने आयोजकले जनाएको छ । बागमति संग भिडन्त गर्ने एक नम्बर प्रदेशको नेतृत्व नेपाल महिला राष्ट्रिय टिमका कप्तान रुबिना क्षेत्रीले गरेकि छिन ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
