काठमाडौँ। धितोपत्र बजारमा शेयर कारोबार मापक नेप्से परिसूचकमा सोमबार उछाल आएको छ। नेपाल राष्ट्र बैंकले आइतबार चालू आर्थिक वर्षको मौद्रिक नीतिको अर्धवाषिक समीक्षा गरेपछि बजारमा थप उछाल देखिएको छ। केन्द्रीय बैंकले मौद्रिक नीतिमा केही सुधार एवं संशोधन गर्ने भन्दै हल्ला चलेका कारण आइतबार नेप्सेमा करेक्सन देखिएको थियो। आइतबार ३३.३३ अङ्कले ओरालो लागेको नेप्से सोमबार ९२.४२ अङ्कले बढेर दुई हजार ५८६.०१ मा पुगेको छ । सोमबारको वृद्धिपछि नेप्सेले दुई हजार ६०० को बिन्दु पहिल्याएको छ।
यस्तै ठूला कम्पनीको शेयर कारोवार मापन गर्ने सेन्सेटिभ परिसूचक १५.३३ बिन्दुले बढेर ४६९.४४ मा पुगेको छ। नेप्सेमा उच्च अङ्कको वृद्धिपछि कारोबार रकम उच्च बिन्दुमा पुगेको छ। कूल २०५ कम्पनीको दुई करोड २४ लाख ४७ हजार १५७ कित्ता शेयर १० अर्ब ३८ करोड ४१ लाख ९७ हजार ६६९ रुपैयाँ मूल्यमा खरिद बिक्री भएको छ।
आजको कारोवारपछि बजार पूँजीकरण साढे ३५ खर्बमाथि पुगेको छ। नेपाल स्टक एक्सचेञ्जका अनुसार बजार पूँजीकरण ३५ खर्ब ६३ अर्ब ३९ करोड ६२ लाख ७० हजार रुपैयाँको हाराहारीमा पुगेको छ । कारोबारका आधारमा आज जीवन बीमा, निर्जीवन बीमा, लघुवित्तको शेयरमा लगानीकर्ता आकर्षित भएका छन्। कारोबार भएका १२ उपसमूहको शेयर नै उकालो लागेको छ।
बैंकिङ ५७.३२, व्यापार ७१.६, होटल २४.१, विकास बैंक ४९.९१, जलविद्युत् ६४.४५, वित्त ३४.७५, निर्जीवन बीमा ४४७.४४, उत्पादन १५९.६६, अन्य ६२.६१, लघुवित्त ३७०.३, जीवन बीमा ६९७.९१, सामूहिक लगानी कोष ०.१८ मा पुगेको छ।
कारोबारका आधारमा आज निर्धन उत्थान लघुवित्त शीर्ष स्थानमा रहेको छ । सो कम्पनीको ७० करोड ४८ लाख ४९ हजार ९४१ रुपैयाँ बराबरको कारोबार भयो । यस्तै, नबिल बैंक ६८ करोड ५ लाख १६ हजार ४७१ रुपैयाँ, छिमेक लघुवित्त ४७ करोड ९१ लाख ४० हजार ४६४ रुपैयाँ, डिप्रोक्स लघुवित्त ४७ करोड ४४ लाख ४१ हजार ७५४ रुपैयाँ, ग्लोबल आइएमई बैंक ४६ करोड ९० लाख २४ हजार ४८३ रुपैयाँ, एनआईसी एसिया बैंक ४० करोड ६९ लाख तीन हजार ३९२ रुपैयाँ, नेको इन्स्योरेन्स ३४ करोड ७४ लाख ४० हजार ८५ रुपैयाँ, नेपाल बैंक लिमिटेड २८ करोड ९९ लाख ८ हजार ३४२ रुपैयाँ र नेपाल पुनर्बिमा कम्पनी २४ करोड ८९ लाख ३ हजार १९६ रुपैयाँको कारोबारसहित शीर्ष स्थानमा रहे।
कारोबारका आधारमा छिमेक लघुवित्त, गरिमा विकास लघुवित्त, मिथिला लघुवित्त, किसान लघुवित्त, एनएमबी लघुवित्त, आरएसडिसी, फरवार्ड लघुवित्त, उन्नती सहकार्य लघुवित्त, सामुदायिक लघुवित्त, आशा लघुवित्तका लगानीकर्ताले समान १० प्रतिशतले कमाएका छन् ।
यस्तै, पञ्चकन्या माई हाइड्रोपावर ४.०३, सानिमा बैंकको ऋणपत्र १.९०, एनआइसि एशिया ऋणपत्र १.५९, एभरेष्ट बैंक १.४८, एनआइसि एशिया बैंकको ऋणपत्र २०८४ को ०.७६ र रैराङ हाइड्रोपावरका लगानीकर्ताले ०.३५ प्रतिशतले गुमाए।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
