त्रिकोणात्मक टी–२० सिरिजका लागि नेपाली राष्ट्रिय टोली घोषणा

 वैशाख १, काठमाडौं । आगामी शनिबारदेखि राजधानीमा हुने ‘ट्राई नेसन क्रिकेट सिरिज’ का लागि नेपाली राष्ट्रिय टोलीको घोषणा भएको छ।  ज्ञानेन्द्र मल्लको कप्तानीमा घोषणा गरिएको १५ सदस्यीय टोलीमा पहिलो पटक युवा खेलाडी साहब आलम पनि समेटिएका छन् ।

कीर्तिपुरस्थित त्रिवि क्रिकेट मैदानमा हुने त्रिकोणात्मक टी–२० सिरिजमा नेपालले मलेसिया र नेदरल्यान्ड्ससँग खेल्नेछ। नेपालले पहिलो खेल नेदरल्यान्ड्सँग वैशाख ४ मा खेल्ने छ। यस्तै, दोस्रो खेल मलेसियासँग वैशाख ६ मा खेल्ने भएको छ। नेपालले तेस्रो खेल नेदरल्यान्ड्सँग वैशाख ७ मा खेल्ने छ।

नेपालले आफ्नो सिरिजको लिगको अन्तिम खेल वैशाख ९ गते खेल्ने भएको छ। लिगमा शीर्ष दुईमा स्थान बनाउन सकेको खण्डमा नेपालले वैशाख ११ गते फाइनल खेल्ने छ। ईसीसी विश्व क्रिकेट लिग–२ अन्तर्गत ओमानमा तय भएको प्रतियोगिता स्थगित भए पनि क्यानले मलेसिया र नेदरल्याण्ड्सलाई बोलाएर यो सिरिज गर्न लागेको हो।

प्रतियोगिताका बेला क्यानले दर्शकलाई पनि प्रवेश गराउने भएको छ। क्यानले त्रिकोणात्मक सिरिज हेर्नका लागि प्रवेश मूल्य १ सय ५० रुपैयाँ तोकेको छ। त्रिकोणात्मक टी–२० सिरिजका लागि नेदरल्यान्ड्स र मलेसियाको क्रिकेट टिम मंगलबार नेपाल आइसकेका छन्। सिरिजका सम्पूर्ण खेलहरु विभिन्न टेलिभिजन र च्यानलको माध्यमबाट विश्वका १ सय ४१ देशबाट लाइभ हेर्न सकिने क्यानले जनाएको छ।

थाहा अनलाइन

यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।