मलेसियामा कामदारको अभाव

काठमाडौं। कोरोना भाइरस संक्रमणका कारण विदेशी कामदार आउन छोडेपछि मलेसियाका रोजगारदाताहरुले विदेशी श्रमिक लिन सहज बनाइदिन सरकारको ध्यानाकर्षण गराएका छन् । फेडेरेशन अफ मलेसियन म्यानुफ्याक्चरर (एफएमएम) ले कामदारको कमीले व्यवसाय सञ्चालन गर्न समस्या परेको भन्दै सकेसम्म छिटो विदेशी कामदार आउने व्यवस्थामा सहजिकरण गरिदिन आग्रह गरेको छ ।

मलेसियामा एफएमएम धेरै रोजगारदाता संलग्नहरुको संस्था मानिन्छ । उक्त संस्थाका अध्यक्ष सोह थियान लीले औद्योगिक क्षेत्रलाई विदेशी कामदार आवश्यक रहेका कारण छुट्टीमा घर फर्किएका कामदारलाई मलेसिया फर्किन सहज गरिदिन माग गरेका छन् ।

मलेसियामा विभिन्न १५ देशका १७ लाख बढी विदेशी कामदार रहेका छन् । त्यसमा नेपाली कामदारको संख्या तीन लाख पचास हजार भन्दा केही बढी रहेको छ । कोभिड–१९ का कारण मलेसियाले नयाँ कामदारका एप्रुभल दिएको छैन ।

अध्यक्ष लीले मलेसियामा विदेशी कामदारले कम तलबमा तल्ला पदमा काम गर्ने गरेको र स्थानीयले तल्ला र कम पारिश्रमिक पाउने काममा रुची नराख्ने भन्दै व्यवसाय चलाउन मानवीय जनशक्ति अपरिहार्य रहेको बताएको स्थानीय सञ्चारमाध्यमहरुले उल्लेख गरेका छन् ।