नेकपा माओवादी केन्द्रका नेता नारायणकाजी श्रेष्ठले प्रतिनिधिसभा विघटन हुनुमा तत्कालीन प्रधानमन्त्री केपी शर्मा ओली मात्र जिम्मेवार नभएको बताएका छन् ।
आजको राष्ट्रियसभा बैठकको विशेष समयमा बोल्दै नेकपा माओवादी केन्द्रका प्रवक्तासमेत रहेका नेता श्रेष्ठले प्रतिनिधिसभा विघटन हुनुमा तत्कालीन प्रधानमन्त्री केपी शर्मा ओली मात्र जिम्मेवार नभएको बताए । उनले एक वा अर्को रूपमा त्यसअघिका सरकार तथा नेताहरू पनि जिम्मेवार रहेको बताएका छन् ।
ओली भन्दा अगाडि विभिन्न ढङ्गले सरकार चलाउनेहरू पनि एक वा अर्को रूपमा, एउटा वा अर्को हदसम्म जिम्मेवार भएको समेत श्रेष्ठले टिप्पणी गरेका छन् ।
नेता श्रेष्ठले भारतीय सीमा सुरक्षा बल (एसएसबी)ले तुइनको तार काटिदिएकै कारण जयसिंह धामी महाकाली नदीमा खसेर बेपत्ता भएको बताएका छन् ।
उनले प्रारम्भिक तथ्यहरूका आधारमा एसएसबीले नै घटना घटाएको निष्कर्षमा पुग्न सकिने बताए । उनले भने, ‘यो अमानवीय, उत्पीडनकारी र क्रुर कार्यको भर्त्सना गर्नुपर्छ । भारतले सार्वजनिक क्षमायाचना गर्नुपर्छ ।’ घटनामा संलग्न दोषीहरूलाई तत्काल कारबाही गर्नुका साथै हेपाहा प्रवृत्ति नदोहोर्याउनु पर्ने उनको मागका छ ।