संयुक्त राष्ट्रसङ्घ (युएन)को शान्ति मिसनमा जान लिइने नेपाल प्रहरीतर्फको आन्तरिक परीक्षाको प्रश्न पत्र बाहिरिएको विषयमा प्रहरी प्रधान कार्यालयले छानबिन अघि बढाएको छ ।
युएन मिसनको प्रि–स्याट परीक्षाको प्रश्न पत्र ‘लिक’ भएको आशङ्कापछि प्रधान कार्यालयले प्रहरी नायब महानिरीक्षक (डिआइजी) वसन्त लामाको नेतृत्वमा छानबिन समिति बनाएर अनुसन्धान थालेको हो । गत १५ र १६ साउनमा प्रधान कार्यालय तथा सात वटै प्रदेश प्रहरी कार्यालयमा युएनमा जाने प्रहरी कर्मचारीका लागि परीक्षा सञ्चालन हुँदै थियो । परीक्षामा प्रहरी जवानदेखि प्रहरी वरिष्ठ उपरीक्षक (एसएसपी)सम्मका २ हजार ४ सय परीक्षार्थी सहभागी हुँदै थिए ।
तर, १६ गतेको परीक्षा सुरु हुनु अघिल्लो दिन नै प्रश्न पत्र बाहिरिएपछि प्रहरी प्रधान कार्यालयले रातारात नयाँ प्रश्न पत्रको सेट तयार गरेर परीक्षा सञ्चालन गर्नुपरेको थियो । सोही कारण परीक्षा निर्धारित समयभन्दा ढिला सुरु भएको थियो । तर, १५ गतेको परीक्षा भने पुरानै प्रश्नबाट भएको थियो । सो परीक्षाको भने प्रश्न पत्र आउट भए-नभएको खुलेको छैन । प्रश्न पत्र लिक भएपछि प्रधान कार्यालयले युएन शाखासँग जोडिएका प्रहरीमाथि निगरानी र सोधपुछ बढाइएको जनाएको छ । सो शाखाका केही प्रहरी भने नियन्त्रणमा समेत रहेको उच्च स्रोतको दाबी छ ।
छानबिन समितिले युएन शाखाकै डिएसपी वासुदेव पाठक, तालिम केन्द्रमा कार्यरत अर्का डिएसपी रुपेश खड्का, प्रहरी निरीक्षक दिनेश पुनलगायतको संलग्नताको आशङ्कामा छानबिन गरिरहेको स्रोत बताउँछ । डिएसपी खड्का पनि परीक्षार्थी थिए । उनी केही समय अघिसम्म युएन शाखामा नै कार्यरतसमेत रहेको बताइन्छ ।
हाल प्रहरी प्रधान कार्यालयले कसरी प्रश्न पत्र बाहिरियो भन्ने विषयमा अनुसन्धान गरिरहेको छ । सो विषयमा यूएनशाखा प्रमुख एसपी अनुपम राणा सँगसमेत जानकारी मागिएको छ ।यो समाचार राजधानी दैनिकमा छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
