भदौ १२ दाङ, राप्ती प्रादेशिक अस्पताल तुलसीपुरका मेडिकल सुपरिटेन्डेन्ट डा. विनोद सिंहमाथि कालो मोसो दलेको २४ घण्टा बित्दा पनि घटनामा संलग्नहरू पक्राउ नपरेपछि स्वास्थ्य कर्मीहरुले प्रहरी कार्यालयमा धर्ना दिएका छन् । अस्पताल विकास समितिका पदाधिकारी, कार्यरत चिकित्सकलगायत सम्पूर्ण कर्मचारी, अन्य निजी स्वास्थ्य संस्थामा कार्यरत स्वास्थ्यकर्मी तथा कर्मचारीहरूले संयुक्त रुपमा आज शनिवार दिउसो १ बजेदेखि साढे १ बजेसम्म इलाका प्रहरी कार्यालय तुलसीपुरमा धर्ना दिएका हुन् ।
प्रहरीले नै यस विषयमा चासो नदिएको उनीहरूको आरोप छ । शुक्रवार दिउसो पौने २ बजेतिर सर्जन परियार, दिवस क्षेत्री, गणेश खड्कासहित ४/ ५ जना युवाहरूले डा. सिंह माथि दुर्व्यवहार गरेका थिए । अस्पतालमा कल्चर सेवा नभएको विषयमा विवादले उग्र रूप लिएपछि परियारसहितको टोलीले शुक्रवार डा. लाई कालो मोसो दलेका थिए ।
साथै आज १ बजेदेखि अस्पतालमा कालो पट्टी बाँधेर स्वास्थ्यकर्मीहरुले इमरजेन्सी सेवा दिने समेत निर्णय भएको अस्पतालका सूचना अधिकारी कृष्णगोपाल चौधरीले बताए । यदि घटनाका विषयमा स्थानीय प्रशासनले चासो नदिए भोलि(आइतबार) बिहान ८ बजे विरोध स्वरूप बजार परिक्रमण गर्ने समेत निर्णय भएको उनले बताए । यदि घटनामा संलग्नहरू पक्राउ नगरेमा अन्य आन्दोलनका कार्यक्रमहरू आइतबार सार्वजनिक गरिने उनको भनाई छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
