सप्तरी । पूर्व पश्चिम राजमार्ग अन्तर्गत सप्तरीमा गए राति एक ट्रकमा आगजनी भएको छ ।
सप्तरीको अग्निसाइर कृष्णसवरण गाउँपालिका ४ मा ना ५ ख १९११ नम्बरको ट्रकमा अज्ञात समूहले आगजनी गरेको हो ।
कुखुराको दाना बोकेर गइरहेको सो ट्रकमा राति अन्दाजी ११ बजेतिर आगजनी भएको इलाका प्रहरी कार्यालय कञ्चनपुरका प्रहरी नायव उपरीक्षक रामकुमार यादवले जनाए ।
उनका अनुसार आगजनी कसले र किन गरेको कुरा खुल्न सकेका छैन । अनुसन्धान भइरहेको प्रहरीले जनाएको छ ।
अज्ञात समूहद्वारा गरिएको आगजनीले ट्रक पूर्ण रूपमा जलेको छ भने यसअघि पुस १६ गते पनि सोही गाउँपालिकाको वडा नम्बर ५ स्थित महुली पुलमा एक ट्रक जलाइएको थियो ।
थाहा अनलाइन
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
