काठमाडौँ। नेपाल कम्युनिस्ट पार्टीका प्रवक्ता खड्गबहादुर विश्वकर्मा ‘प्रकाण्ड’ले आफू एमाले प्रवेश गर्ने भ्रमित समाचारहरूबाट भ्रमित नहुन आग्रह गरेका छन्। केही सञ्चारमाध्यममा उनी एमाले प्रवेश गर्ने तयारीमा रहेका समाचारहरू आएका थिए। समाचार सार्वजनिक भएपछि प्रकाण्डले आफू एमाले प्रवेश गर्ने भन्ने कुरा कुप्रचार भएको बताए।
यस विषयमा केही सञ्चारमाध्यममा आएका समाचारका विषयमा प्रतिक्रिया दिँदै प्रकाण्डले भने, म एमालेमा प्रवेश गर्ने कुरा त टाढैको हो। यो सोच्न पनि सकिँदैन।’ उनले नेपाल कम्युनिस्ट पार्टीले लिएको वैज्ञानिक समाजवादी कार्यक्रमले राष्ट्रिय राजनीतिको नेतृत्व गर्न लागेकाले नेकपाको सफलताबाट आत्तिएकाहरूको कुप्रचार मात्र भएको टिप्पणी गरे । उनले यस्तो कुप्रचार गर्नेहरूलाई जनताले कारबाही गर्ने चेतावनी पनि दिए।
‘पार्टीको क्रान्तिकारी विचार, नेतृत्व, एकीकृत जनक्रान्तिको कार्यदिशा र वैज्ञानिक समाजवादको कार्यक्रम नेपाली जनतामा लोकप्रिय हुँदै गएको छ। यो लोकप्रियताले आत्तिएका, डराएका, साम्राज्यवादी र दलाल पुँजीवादी तत्त्वका एजेन्टहरूको कुप्रचार मात्र हो। यसमा भ्रमित नहुन म सबैलाई आग्रह गर्दछु,’ उनले भनेका छन्। न्युज कारखानाबाट
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
