नवलपरासी पश्चिम लयही चैत २२ गतेदेखि देशैभर सुरु हुन गइरहेको टाइफाइड रोगविरुद्धको खोप अभियान कार्यक्रम अन्तर्गत नवलपरासी पश्चिमको प्रतापपुर गाउँपालिका भित्र रहेका सामुदायिक, निजी तथा धार्मिक मदरसाका विद्यालय जाने र नजाने बालबालिकालाई टाइफाइड रोगविरुद्धको खोप लगाइने भएको छ । यस क्रममा प्रतापपुर वडा नं ५ स्थित बैदौली स्वास्थ्य चौकी र वडा नं ६ स्थित गुठी परसौनी स्वास्थ्य चौकीले टाइफाइड विरुद्धको खोप अभियान सफल बनाउन सरोकारवाला बिच आइतबार एक दिने अभिमुखीकरण कार्यक्रम सम्पन्न गरेको हो ।
यी दुवै वडा भित्र रहेका सम्पूर्ण विद्यालय जाने उमेर समूहका र विद्यालय नजाने उमेर समूहका बालबालिकालाई खोप दिइने सम्बन्धित स्वास्थ्य चौकीले बताएको छ । १५ महिना देखि १५ वर्ष उमेर समूहका सबै बालबालिकालाई खोप दिइने स्वास्थ्य शाखाले बताएको छ । बैदौली स्वास्थ्य चौकी अन्तर्गत विद्यालय जाने र नजाने जम्मा १९ सय ३१ बालबालिकाहरूलाई खोप दिइने प्रमुख कौशल कुमार यादवले बताएका हुन यसै गरी गुठी परसौनी स्वास्थ्य चौकीका इन्चार्ज सञ्जय कुमार महत् तोका अनुसार वडा नं ६ भित्र रहेका २३ सय ४ बालबालिकालाई टाइफाइड विरुद्धको खोप मात्रा दिइने छ । नवलपरासी पश्चिम जिल्लाको सात वटै स्थानीय तहमा ८६ हजार बालबालिकाहरूलाई खोप दिइने जिल्ला स्वास्थ्य कार्यालयले जनाएको छ । स्वास्थ्य कार्यालय परासीले दिएको जानकारी अनुसार विद्यालय र स्वास्थ्य चौकीलाई खोप केन्द्र स्थापना गरी १५ महिना देखि १५ बर्ससम्मका बालबालिकाहरूलाई नछुट्ने गरी टाइफाइड रोगविरुद्धको खोप दिइने हो । नेपालमा पहिलो पटक टाइफाइड रोगविरुद्धको खोप लगाइने भएकोले यस अभियानलाई सफल बनाउन प्रतापपुर स्वास्थ्य शाखाले सबै सरोकारवालाहरुसंग सहयोगका लागि अनुरोध गरेको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
