दाङका उम्मेदवारलाई आज चिन्ह दिइने

दाङ, असार ६ ।

निर्वाचन आयोगले स्थानीय तह दोस्रो चरण निर्वाचनका लागि मनोनयन दर्ता गराएका दल तथा स्वतन्त्र उम्मेदवारहरूलाई आज निर्वाचन चिह्न दिने भएको छ ।

असार १४ का लागि तय भएको स्थानीय तह दोस्रो चरणको निर्वाचनका लागि दाङसहित प्रदेश १, ५ र ७ का ३५ जिल्लाका ३ सय ३४ स्थानीय तहमा कायम भएका मुख्य निर्वाचन अधिकृत तथा निर्वाचन अधिकृतको कार्यालयबाट मनोनयन दर्ता गराएका पार्टी तथा स्वतन्त्र उम्मेदवारहरूलाई आयोगले आज निर्वाचन चिह्न दिने भएको हो ।

आयोगले स्थानीय तह निर्वाचन प्रयोजनका लागि जारी गरेको निर्वाचन कार्यतालिकाअनुसार ४ असारमा दल तथा स्वतन्त्र उम्मेदवारहरूले मुख्य निर्वाचन अधिकृत तथा निर्वाचन अधिकृतको कार्यालयमा पुगी उम्मेदवारीको मनोनयन दर्ता गराएका थिए । सोही दिन नै दर्ता भएका उम्मेदवारको सूची प्रकाशनसमेत भइसकेको छ । उम्मेदवारी फिर्ता लिन आयोगले आज मंगलबार बिहान ८ बजेबाट ११ सम्मको समय तोकेको छ भने अन्तिम नामावली प्रकाशन पनि आज नै गर्ने आयोगको तयारी छ ।

स्थानीय तह निर्वाचनअन्तर्गत कुल ७ सय ४४ स्थानीय तहका कुल १८ हजार ५ सय ७२ निर्वाचन केन्द्रमध्ये दोस्रो चरणमा ३ सय ३४ तहका ८ हजार ३ सय ६४ केन्द्र र ४ हजार ५ सय ८१ स्थलमा निर्वाचन हुने आयोगले बताएको छ । जसमा एक महानगर, सात उपमहानर, १ सय ११ नगरपालिका र २ सय १५ गाउँपालिका रहेका छन् । १४ असारमा हुने निर्वाचनमा ६४ लाख ३२ हजार ७ सय ६५ मतदाताले भाग लिनेछन् भने सो निर्वाचनबाट १५ हजार ३८ प्रतिनिधि चयन हुनेछन् । प्रदेश–३, ४ र ६ मा भने ३१ वैशाखमा नै निर्वाचन सम्पन्न भइसकेको छ भने प्रदेश–२ मा २ असोजमा निर्वाचन हुनेछ ।

थाहा अनलाइन

यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।