एकमहिना अगाडी प्रहरी इन्काउन्टरमा मारिएका गुन्डा नाइके मनोज पुनको आपराधिक क्रियाकलापमा रुपन्देहीका सत्ताधारी नेताहरूको पनि संलग्नता पाइएको छ । मनोज पुनलाई व्यापारीको हरेक सूचना पुर्याउने र रकम असुलीमा सहयोग गरेको तथ्य फेला पारेपछि माओवादी केन्द्रका केन्द्रीय सदस्य लेखनाथ न्यौपानेसहित नेता तथा व्यवसायीलाई मंगलबार प्रहरीले पक्राउ गरेको हो ।
युवासंघ रुपन्देहीका तत्कालीन अध्यक्ष दुर्गा तिवारी, व्यापारी बलु पौडेललगायतको हत्याका मुख्य अभियुक्त मनोज पुनलाई सीधै सम्पर्क गरेर सूचना पुर्याएको प्रमाण फेला पारेपछि नेता तथा व्यवसायीलाई प्रहरीले पक्राउ गरेको हो । पुन झन्डै एक महिनाअघि प्रहरी इन्काउन्टरमा मारिएका थिए । यो खबर आजको नयाँपत्रिका दैनिकले छापेको छ ।
को को हुन् त पक्राउ पर्नेहरु ?
रुपन्देही देवदहका लेखनाथ न्यौपाने (माओवादी केन्द्रका केन्द्रिय सदस्य)) बुटवल उपमहानगरपालिका वडा नं ७ शिवनगरका उत्तम आचार्य, देवदह नगरपालिका वडा नं ५ बस्ने तुल्सी न्यौपाने, स्याङ्जा पुतलीबजार नगरपालिका वडा नं ४ घर भई बुटवल बस्ने हरिप्रसाद श्रेष्ठ र देवदह नगरपालिका वडा नं ६ बस्ने रोशन खड्का ।
लेखनाथ न्यौपाने माओवादी केन्द्रका केन्द्रीय सदस्य तथा अनेरास्ववियु क्रान्तिकारीका रुपन्देही पूर्व अध्यक्ष हुन् । त्यस्तैतुल्सी न्यौपाने माओवादी केन्द्रका कार्यकर्ता हुन् । त्यसैगरी आचार्य एमाले निकटको युथफोर्सको पूर्वनेता हुन् । श्रेष्ठ मदिरा व्यवसायी हुन् । श्रेष्ठले दुईजनाको हत्या गर्नका लागि मनोज पुनलाई रकम उपलब्ध गराएको प्रहरीले जनाएको छ । खड्का जग्गा व्यापारी हुन् ।
कसको भूमिका के थियो ?
लेखनाथ न्यौपाने तथा तुल्सी न्यौपाने, रोशन खड्का र उत्तम आचार्यले रकम असुलीकालागि मनोज पुनसँग सम्पर्कमा रहेर विभिन्न भूमिका निर्वाह गरेको पाइएको प्रहरीले जनाएको छ । विभिन्न उद्योगी व्यवसायीको नाम पुनलाई दिने र यीमध्ये सात आठजनाको हत्या गर्न सकेमा पैसा धेरै आएर सम्हाल्न पनि कठिन हुने स्थिति आउन सक्ने भन्दै पुनसँग संवाद गरेका छन् । उनीहरूले पुनको आपराधिक कामलाई सघाउने र पक्राउ परेकाहरूलाई छुटाउन राजनीतिक नेतृत्वमा दबाब दिनेदेखि रकम असुली गर्न नेता तथा व्यवसायीले दबाब दिँदै आएको खुलेको छ ।
माओवादी नेताले कसरी पुर्याउँथे त रिपोर्ट ?
मनोज पुनको आपराधिक क्रियाकलापको अनुसन्धान गर्दै आएका रुपन्देहीका प्रहरी प्रमुख प्रहरी उपरीक्षक (एसपी) श्याम ज्ञवालीले पक्राउ परेकाहरूबीच सहकार्य नभई पुनसँग छुट्टाछुट्टै सम्पर्कमा रहेर सघाउने गरेको पाइएको बताएका छन् । ‘पुनले विभिन्न डिर्पाटमेन्टहरू खडा गर्ने र विभिन्न व्यक्तिहरू सम्पर्कमा रहने, त्यही ग्रुपबाट आपराधिक जालो फस्टाएको पाइएको छ,’ उनले भने, ‘अझै केही छुटेका छन्, ती पनि पक्राउ पर्छन ।’
अनुत्तरित प्रश्नः ५०औँ करोड पैसा कहाँ गयो ?
अपराध अनुसन्धान गरिरहेका एसपी ज्ञवालीले पुनको समूहबाट ५०औँ करोड रकम उठेको हुन सक्ने बताए । उनी भन्छन्, ‘५०औँ करोडभन्दा बढी रकम गयो भन्ने लाग्छ, तर कहाँ गयो भन्ने अनुत्तरित छ, रकम बुझाउनेहरूले को–को मार्फत कति रकम दिनुभयो, त्यो गोप्य रूपमा जानकारी गराउनुभयो भने तथ्य खुल्ने र डम्प भएको रकम राज्यले लिन पनि सक्ने थियो ।’
न्यौपानेले रसियन महिलालाई भारत पुर्याउने गरेको आशंका
प्रहरीले माओवादी नेता नेखनाथ न्यौपानेको रसियन महिलाहरूलाई नेपालको बाटो हुँदै भारत पुर्याउने भूमिकामा समेत संलग्नता रहेको आशंका गरेको छ । मनोज पुन भारतमा रहँदा त्यहाँका आपराधिक समूहका नाइके योगेन्द्र सिंहसँग सम्पर्कमा रहेको प्रहरीको भनाइ छ । सिंहसँग न्यौपानेको सीधा सम्पर्क रहेको प्रहरीको आशंका छ । भारतमा रहँदा पुनपनि रसियन युवतीसँग समेत बस्ने गरेको र सिंहसँग रसियन महिला पुग्ने गरेको आशंका प्रहरीको छ । सिंहसँग पुग्ने रसियन महिलाहरू नेपालको बाटो जान न्यौपानेले सहयोगी भूमिका खेलेको प्रहरीको भनाइ छ । एसपी ज्ञवालीले यस्ता अपराधमा केही भारतीय नागरिकको समेत संलग्नता रहेको हुन सक्ने बताए ।
सहयोगले ऊर्जा मिलेको छः प्रहरी
रुपन्देहीका प्रहरी प्रमुख ज्ञवालीले अपराध नियन्त्रण गर्नमा जनप्रतिनिधि, राजनीतिक दल, व्यवसायी, नागरिक समाज तथा मिडियाको साथ रहेकाले प्रहरीलाई ऊर्जा मिलेको बताए ।
के कस्तो मुद्धा लाग्छ त उनीहरुलाई ?
प्रहरीले पक्राउ परेकाहरूलाई कर्तव्य ज्यान, जबर्जस्ती असुली, संगठित अपराध, हातहतियार खरखजाना लगायतका मुद्दा लगाउने तयारी गरेको छ । उनीहरूले अपराधमा विभिन्न कोणबाट भूमिका खेलेकाले विभिन्न मुद्दा लगाउने तयारी गरेको प्रहरीले जनाएको छ ।
यी घटनामा संलग्नता
पक्राउ परेकाहरू २२ कात्तिक ०७२ मा नारायण बस्नेतलाई गोली हानी ज्यान मार्ने उद्योग गरेको, ६ फागुन ०७२ मा दुर्गाप्रसाद तिवारीलाई गोली हान्ने प्रयास गरेको, ४ पुस ०७३ मा दुर्गाप्रसाद तिवारीलाई गोली हानी हत्या गरेकोमा संलग्नता रहेको प्रहरीको भनाइ छ ।
त्यसैगरी २१ पुस ०७४ मा बलु भन्ने वसन्त पौडेललाई गोली हानी हत्या गरेको घटनामा मुख्य योजनाकार समेत रहेका मनोज पुन भन्ने मनोज बुढामगर र बिट्टु भन्ने योगेन्द्र सिंहसँग निरन्तर रूपमा फोन सम्पर्क रहेको प्रहरीको भनाइ छ । पुनलाई रुपन्देही जिल्लाका उद्योगी व्यापारीको सम्बन्धमा सम्पूर्ण विवरण उपलब्ध गराउने, आपराधिक कार्यमा प्रोत्साहन गर्ने, उक्साउने तथा आर्थिक रूपमा सहयोग गर्ने गरेको पाइएको प्रहरीको भनाइ छ ।{शिर्षक हामीले दिएका हौं}
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
