सैघाली खबर
काठमाडौं, २१ बैशाख
सरकारी निर्णयको विरोध गर्दै सार्वजनिक सवारी साधन ठप्प पारेका यातायात व्यवसायीलाई प्रहरीले पक्राउ गरेको छ । गृह मन्त्रालयको निर्देशन लगतै प्रहरीले ब्यवसायिका केन्द्र देखि जिल्ला तहका यातायात समितिका पदाधिकारी पक्राउ गरेको हो । नेपाल यातायात ब्यवसायी राष्ट्रिय महासंघका महासचिव सरोज सिटौलालाई प्रहरीले काठमाडौबाट पक्राउ गरेको छ ।
सिटौलालाई काठमाडौंको रत्नपार्कबाट पक्राउ गरिएको महानगरीय प्रहरी परिसरका प्रमुख एसएसपी विश्वराज पोखरेलले जानकारी दिनुभयो । यस्तै पश्चिम नेपाल बस व्यवसायी संघका उपाध्यक्ष जीवन बञ्जाडे र महासचिव पदमराज गाहालाई रुपन्देही प्रहरीले बुटवलबाट नियन्त्रणमा लिएको छ ।
सरकारी निर्णयको विरोधमा उत्रिएका उनीहरुलाई नियन्त्रणमा लिएको जिल्ला प्रहरी प्रमुख एसपी श्याम ज्ञवालीले बताउनुभयो । जिल्ला प्रहरी कार्यालयले दुई जनालाई नियन्त्रणमा लिएको छ । काभ्रे यातायात तथा मिनिबस सेवा समितिका उपाध्यक्ष शान्ताराम तामाङ र सदस्य नरेन्द्र हलुवाईलाई नियन्त्रणमा लिईएको जिल्ला प्रहरी प्रमुख एसपी सहकुल थापाले जानकारी दिनुभयो ।
मकवानपुरबाट समेत व्यवसायी पक्राउ परेका छन् । कास्की र पाल्पाका प्रमुख जिल्ला अधिकारीले यातायातका साधन नचलाउने यातायात ब्यवसायीलाई मुद्दा चलाउने तयारी गर्नुभएको छ । कास्कीका प्रमुख जिल्ला अधिकारी तारानाथ अधिकारीले सार्वजनिक यातायात अत्यावश्यक सेवा भित्र परेको र कुनैपनि बाहानामा यसलाई रोक्न नहुने भन्दै सेवा रोक्ने विरुद्द अत्यावश्यक सेवा ऐन अन्र्तगत मुद्दा चलाउन प्रहरीलाई निर्देशन दिइएको उहाँको भनाई छ ।
अधिकारीका अनुसार सेवा रोक्ने समितिको खारेजी देखि रुट परमिट रोक्ने र समितिका पदाधिकारीको हकमा भने ब्यक्तिगत सम्पतिको छानविन समेत गरिने छ । जिल्ला प्रशासन कार्यालय पाल्पाले सार्वजनिक अत्यावश्यक सेवा ऐन लगाएर कारबाहीको प्रक्रिया अगाडि बढाएको जनाएको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
