आफूहरुले गरेको सिन्डिकेटको पक्षमा वकालत र संघर्ष गर्दै आएका यातायात व्यवसायीले सिन्डिकेटविरुद्ध सरकार कडा रुपमा आएपछि अन्ततः आन्दोलन फिर्ता लिएका छन् ।
यातायात व्यवसायी महासंघ आन्दोलन मूल समितिका संयोजक योगेन्द्रनाथ कर्माचार्यले आज विज्ञप्ती जारी गर्र्दै आन्दोलन फिर्ता लिएको घोषणा गरेका हुन ।
व्यवसायीले आजदेखि देशभर नै सम्पूर्ण सार्वजनिक यातायात सेवा पुनः सञ्चालन हुने जनाउँदै बन्दबाट सर्वसाधारणमा पर्न गएको समस्याप्रति विज्ञप्तिमार्फत माफी मागेका छन् ।
विज्ञप्तिमा पक्राउ परेका यातायात व्यवसायीलाई निःर्शत रिहा गर्न र यातायात क्षेत्रमा देखिएका विद्यमान समस्याको समाधानका लागि सरकारले आफूहरुलाई वार्तामा बोलाउनुपर्ने जनाइएको छ ।
सरकारले आफूहरुलाई वार्तामा बोलाउनु पर्ने र नयाँ गाडीहरुलाई अनुमति दिँदा आफूहरुसँग परामर्श गर्नुपर्ने माग राख्दै यातायात व्यवसायी महासंघको नेतृत्वमा हिजो देशभर गाडी ग्यारेजमै थन्काएका थिए ।
तर सरकारले ग्यारेजमै गाडी थन्काउने र यातायात जस्तो अत्यावश्यक सेवामा अवरोध गर्ने व्यवसायीलाई पक्राउ गर्न निर्देशन दिएको थियो ।
यातायात व्यवसायी राष्ट्रिय महासंघका उपाध्यक्ष कृष्णप्रसाद सुवेदी, महासचिव सरोज सिटौला, सह–कोषाध्यक्ष डम्बर पन्त लगायत देशभरबाट झन्डै सय जना यातायात व्यवसायी पक्राउ परेका थिए ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
