मतदाता परिचयपत्र वितरण आज पनि, मतदाता शिक्षा पनि सँगै दिइने

असार १२ दाङ

असार १४ गते हुने दोस्रो चरणको निर्वाचनका लागि निर्वाचन आयोगले आज पनि मतदाता परिचयपत्र वितरणको कामलाई निरन्तरता दिने भएको छ । दोस्रो चरणमा निर्वाचन हुने प्रदेश नम्बर १, ५ र ७ अन्तर्गत ३५ जिल्लाका ३ सय ३४ स्थानीय तहका मतदातालाई हिजोदेखि परिचयपत्र वितरण शुरु भएको र भोलिसम्म जारी रहने आयोगले जनाएको छ । दोस्रो चरणमा ६४ लाख ३२ हजार ७ सय ६५ मतदाता रहेका छन् । आयोगले मतदाता परिचयपत्र विना मतदान गर्न नपाइने भएकाले आफ्नो मतदान केन्द्रमा गएर परिचयपत्र लिन आग्रह गरेको छ । मतदाता परिचयपत्र लिन मतदाता स्वयं मतदान केन्द्रमा पुग्नुपर्नेछ । तर कुनै कारणले आफू पुग्न नसक्ने भएमा परिवारका सदस्यमार्फत लिन मन्जुरीनामा अथवा नागरिकताको प्रमाणपत्र दिएर पठाउन सकिने आयोगले जनाएको छ । परिचयपत्र लिन आउनेका लागि आयोगले मतदाता शिक्षा पनि दिने गरेको छ ।