सैघाली खबर
काठमाण्डौं,८ जेठ
सरकारले सार्वजनिक गरेको नीति तथा कार्यक्रमको ७९ औँ बुँदामा रोजगारी अवसरका सम्भाव्य क्षेत्र पहिचान गर्न रोजगारीका लागि व्यसायिक सीप विकास गर्न र देशभित्रै व्यापक रोजगारीका अवसरको सिर्जना गरी पाँच वर्षभित्र रोजगारीका लागि विदेश जानुपर्ने स्थितिको अन्त्य गर्न प्रधानमन्त्री रोजगार कार्यक्रम कार्यान्वयन गरिनेछ भनिएको छ । अर्थविद् डाक्टर चन्द्रमणी अधिकारी आउँदो आर्थिक वर्षको कार्यक्रमले निर्धारण गर्ने बताउनुहुन्छ ।
अधिकारीले भन्नुभयो, ‘पाँच वर्ष भनेको हुनाले भोलिको दिनमा हाम्रा कार्यक्रम कस्ता आउँछन्, त्यसले पनि निर्धारण गर्छ ।’ अहिले दैनिक दुई हजार नेपाली वैदेशिक रोजगारीमा गइरहेका छन् । यस्तो अवस्थामा हरेक सरकारले ल्याउने नीति तथा कार्यक्रम महत्वकाक्षी मात्र आउने तर व्यवहारमा लागु गर्न कठिन हुने टिप्पणी हुन थालेको छ ।
युवा अभियन्ता प्रदिप परियार नीतिमा यो कार्यक्रम आउनु सकारात्मक भएको बताउनुहुन्छ । तर बजेट र कार्यक्रम प्रभावकारी नभए यो विषय घोषणामा मात्रै सिमित हुने उहाँको टिप्पणी छ । तर विज्ञले भने अहिले ५ बर्षका लागि स्थायी सरकार बनेकाले पाँच वर्षभित्र रोजगारीका लागि विदेश जानुपर्ने स्थितिको अन्त्य गर्न प्रधानमन्त्री रोजगार कार्यक्रम कार्यान्वयनमा आउने अपेक्षा गर्न सकिने बताएका छन् ।
वैदेशिक रोजगार विभागको तथ्यांक हेर्दा श्रम स्वीकृति लिएर हालसम्म करिब ४४ लाख व्यक्ति रोजगारीको सिलसिलामा विभिन्न मुलुक पुगेका छन् । तीमध्ये ९५ प्रतिशत कामदारको गन्तव्य खाडीका ६ मुलुक र मलेसिया हुँदै आएको छ । सरकारले यसअघि ल्याएको युवा स्वरोजगार कार्यक्रम जस्तै केही सिमित व्यक्तिको वर्चश्व हुने डर यो कार्यक्रममा पनि छ । त्यसैले कार्यक्रमको घोषणा मात्रै होइन, कार्यान्वयन गर्न एक दिन पनि खेर नफाली लाग्नुपर्ने देखिन्छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
