गण्डक नहरका कारण खेती योग्य जमिन डुबानमा परेपछि पीडितहरूले गण्डक नहरको बाध भत्काएका छन् । नवलपरासीको सुस्ता गाउँपालिका–२ लक्ष्मीपुरमा खेतमा जमेको पानीको निकास नभएपछि उनीहरूले भारततर्फ पानी लैजाने गण्डक नहरको डिल भत्काएका हुन् । स्थानीयले रातिको समयमा डिल भत्काएको सुस्ता गाउँपालिकाका अध्यक्ष रामप्रसाद पाण्डेले बताए ।
भारतीय पक्षले वर्षायामको पानी निकासका लागि ‘साइफल’ मर्मत नगर्दा खेतीयोग्य जमिन वर्षेनी डुबानमा पर्ने गरेको आजको नयाँ पत्रिकामा समाचार छ । पाण्डेका अनुसार अहिले करिब तीन सय विगाहा जमिन डुबानमा परेको छ । धान खेती डुबानमा परेपछि आक्रोशित किसानले राति नहरको डिल फुटाएको सुस्ता गाउँपालिका–२ का अध्यक्ष कृष्णलाल मुखियाले बताए ।
नहरको डुबानका कारण खेतमा जमेको पानीको मात्रा निकै घटेको छ । सुुस्ता गाउँपालिका अध्यक्ष पाण्डेले भारतीय पक्षकालाई जानकारी गराएको र प्रतिनिधिहरू आइसकेकाले छलफल गरी निकास निकाल्ने बताए ।
नहरकै कारण वर्षेनी डुबानमा पर्नेगरेको र भारतिय पक्षले कुनै चासो नदिएपछि पीडितहरूले गत वर्ष पनि नहर फुटाउने प्रयास गरेका थिए । नवलपरासीका प्रमूख जिल्ला अधिकारी देवेन्द्र लामिछानेले समस्या समाधानको विषयमा भारतीय पक्षसँग छलफल सुरू गरिएको जानकारी दिए ।