४ साउन, बुटवल । प्रदेश ५ को स्थायी राजधानी र नामाकरणका लागि प्रदेश सभाले विशेष समिति गठन गरेको छ ।
बिहीबार बसेको प्रदेशसभा वैठकमा सभामुख पूर्णबहादुर घर्तीले १५ सदस्यीय विशेष समितिमा रहेका सदस्यहरुको नाम घोषणा गरेका हुन् ।
समितिले आगामी तीन महिनाभित्र प्रदेश ५ को स्थायी राजधानी र नामाकरणबारे अध्ययन गरी प्रदेश सभामा प्रतिवेदन बुझाउनुपर्ने समय सीमा तोकिएको छ ।
समितिमा अस्थायी राजधानी रहेको रुपन्देहीबाट तुल्सी चौधरी र रमा अर्याल रहेका छन् । अर्घाखाँचीबाट कल्पना पाण्डे, निर्मला क्षेत्री र चेतनारायण आचार्य छन् ।
कपिलवस्तुबाट विष्णु पन्थी र सहषराम यादव,पाल्पाबाट वीरबहादुर राना र नारायण आचार्य, बर्दियाबाट भुवनेश्वरी चौधरी, रोल्पाबाट दीपेन्द्रकुमार पुन,प्युठानबाट तारा जीसी,गुल्मीबाट दिनेश पन्थी,दाङबाट सरस्वती गौतम र बांकेका बाबुराम गौतम रहेका छन् ।
समितिमा पश्चिम नवलपरासी र रुकुम पश्चिबाट प्रतिनिधित्व भएको छैन । समितिले जस्तो प्रतिवेदन बुझाएपनि प्रदेश नामाकरण र स्थायी राजधानीको अन्तिम टुंगो भने प्रदेश सभाको दुई तिहाई वहुमतले निर्णय गर्ने संवैधानिक व्यवसथा छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
