२२० यात्री सवार विमानमा बेस्सरी मोजा गनाएपछि गराइयो आकस्मिक अवतरण

अमेरिकाको स्पिरिट एयरलाइन्सको विमानमा यात्रीहरूले गनाउने मोजाको जस्तो गन्ध आएको गुनासो गरेपछि विमानको आकस्मिक अवतरण गराइएको छ ।

साउथ क्यारोलाइनामा अवतरण गरेपछि विमानमा पाँच घन्टासम्म खोजतलाश गर्दा पनि कुनै दुर्गन्धित कुरा भेटिएन । पछि यात्रीहरूलाई अर्को उडानबाट गन्तव्यमा पठाइयो ।

यो घटना बिहीवार भएको थियो । विमान राति साढे ८ बने उडेको थियो । उडानकै क्रममा यात्रीहरूले गन्ध आएको, छाती दुखेको र गलामा पोलेको गुनासो गरे । विमानलाई बिहीवार राति १० बजे साउथ क्यारोलाइनामा अवतरण गराइयो । विमानमा २२० यात्री थिए ।स्पिरिट एयरलाइन्सले बताएअनुसार, खोजी र अन्य आवश्यक प्रक्रिया पूरा गरेपछि यात्रीहरूलाई अर्को विमानबाट पठाइने निर्णय गरियो । उनीहरू पाँच घन्टा ढिलो गरी बिहान पौने ५ बजे फ्लोरिडा पुगे ।