सल्यान : २५ वर्षदेखि फरार रहेका एक व्यक्तिलाई प्रहरीले पक्राउ गरेको छ। मंगलबार जिल्ला अदातलबाट ३ महिना १८ दिन कैदको फैसला सुनाएपछि फरार रहेका शारदा नगरपालिका-४ का अजुर्नकुमार केसीलाई पक्राउ गरिएको हो।
विस २०५० सालमा जबरजस्ती करणीमा केसीलाई कैदको फैसला गरेको थियो। केसीको फैसला कार्यान्वयनका लागि जिल्ला अदातलमा पेश गरिएको जिल्ला प्रहरी कार्यालय सल्यानका प्रहरी प्रमुख वीरेन्द्रबहादुर शाहीले जानकारी दिए।
गाउँघरमै लुकीछिपी बसिरहेका केसीलाई गाउँबाटै पक्राउ गरिएको हो। यस्तै कुटपिट मुद्दामा फैसला सुनाइएका अर्का एकजना पनि ६ वर्ष पछि प्रहरीले पक्राउ गरेको छ।
बागचौर नगरपालिका-८ र ९ साविक कोटमौला निवासी देवबहादुर मल्ललाई पक्राउ गरिएको शाहीको भनाई रहेको छ। वि.स.२०६९ सालमा जिल्ला अदातल सल्यानले मल्ललाई ६ महिनाको कैद फैसला सुनाएको थियो।
विभिन्न मुद्दामा जिल्ला अदातल सल्यानबाट सजाय पाएर फरार भएका अन्य व्यक्तिहरूको पनि खोजतलास गर्ने कार्य तीब्र पारिएको प्रहरी प्रमुख शाहीको भनाई रहेको छ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
