निमु सगमं घर्ती,
घोराही, ११ भदौ।
घोराही उपमहानगरपालिकाले नगरका प्रत्येक वडामा शिशु स्याहार र बालविकास केन्द्र सञ्चालन गर्ने भएको छ । उपमहानगरले मातृशिशु मृत्युदरलाई शून्यमा झार्नका लागि शिशु स्याहार केन्द्र स्थापना गर्ने पहिलो नगरसभाबाट पारित गरेको हो ।
बालबालिकाको चौतर्फि विकासका लागि प्रत्येक वडाहरुमा वाल बिकास केन्द्र सञ्चालन गर्ने गरि निति तथा कार्यक्रममा समाबेश गरिएको उपमहानगरका मेयर नरुलाल चौधरीले जानकारी दिए । साथै वालमैत्री स्थानिय शासनको अभियानलाई सुदृढ र प्रभाबकारी बनाउदै उपमहानगरलाई अबको ५ बर्षमा बालमैत्री नगर घोषणा गर्ने पनि कार्यक्रम तय भएको छ ।
त्यसैगरी, कुपोषणबाट ग्रसित विपन्न परिवारका बालबालिकालाई उचित पोषणका लागि प्रत्येक वडामा पोषण पुर्नस्थापना केन्द्रको अबधारणा समेत लागु गरिने मेयर चौधरीले उल्लेख गरेका छन् । साथै बालबिबाहलाई न्यूनिकरण गर्न नगरका हरेक वडाका टोल टोलमा सचेतना मूलक कार्यक्रमहरु पनि सञ्चालन हुने भएका छन् ।
त्यसैगरी घोराही बजार आसपासमा वाल उद्यानको निर्माण गर्ने, नगरमा बन्ने भौतीक संरचना बनाउन बालमैत्री पक्षलाई ध्यान दिने र नगर क्षेत्रमा विकास साझेदार संस्थाहरु सँग समन्वय गरि बालमैत्री सिकाई केन्द्र स्थापना गर्ने समेत योजना निति कार्यक्रममा समाबेश गरिएको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
