सागर रिजाल
प्युठान । हरेक वर्ष विपदका घट्नाहरु घटिरहदा आगलागीले पनि जिल्लाका विभिन्न ठाउँमा आपत पार्ने गर्दछ । विपदका घट्नाहरु मध्यमा आगलागी एउटा प्रमुख घट्ना हो । आगलागीले बसेको बस्ती संगै बनजंगल सखाप पार्ने गर्दछ ,कसैको ज्यानै समेत लिन्छ छेडभरमै । त्यसैले आगलागी पूर्व जोखिम न्युनीकरणका लागि सजग हुनुपर्छ । जिल्लामा गर्मीयाममा आगलागीका घट्नाहरु धेरै घट्ने गरेका छन् ।
मंगलबार जिल्ला विपद व्यवस्थापन समिति प्युठानले आगलागी सम्वन्धि जनचेतनामुलक कृतिम व्यवहारिक अभ्यास प्रस्तुत गरेको छ । विशेष गरी सुख्खा याममा वर्षेनी आगलागी बाट जिल्लामा धनजनको क्षती हुने गरेको छ । आगलागीका घटना कसरी हुन्छ, घटना घटिसकेपछि उद्दार तथा राहतका प्रकृया कसरी हुन्छ, घटनाको सूचना संकलन देखि उद्दार, राहत तथा पुनस्थापनामा कुन कुन निकायको के कस्तो भूमिका रहन्छ, आगलागीका घटनाबाट बच्न व्यक्ति, परिवार तथा समुदाय कसरी सचेत रहनुपर्दछ भन्ने जस्ता विषयबस्तुलाई समेटेर सबै क्रियाकलाप प्रत्यक्ष रुपमा अभ्यास गरेर देखाइएको थियो । अभ्यास तीन दिन सम्म चलाईएको थियो ।
मंगलबार सञ्चालित कृत्रिम व्यवहारिक अभ्यासमा जिल्ला तथा स्थानीय विपद व्यवस्थापन समितिका पदाधिकारीहरु, जनप्रतिनिधिहरु, राजनैतिक दलका प्रमुख तथा प्रतिनिधिहरु, कार्यालय प्रमुखहरु, विभिन्न गैरसरकारी संघसंस्थाका प्रतिनिधहरु, सुरक्षाकर्मीहरु, विद्यालयका विद्यार्थीहरु तथा स्थानीय सर्वसाधारण उपस्थिति रहेको थियो । उक्त कार्यक्रम प्यूठान नगरपालिकाको आर्थिक सहयोग तथा नेपाली सेना, नेपाल प्रहरी, सशस्त्र प्रहरी बल नेपाल, डिभिजन बन कार्यालय, नेपाल रेडक्रस सोसाइटी लगायतका निकाय तथा संघसंस्थाको प्राविधिक सहयोग तथा व्यवस्थापनमा सञ्चालन भएको थियो ।
जनचेतनासंगै जोखिम घटाउन अभ्यास कार्यक्रम
प्यूठान जिल्लाका सरुमारानी, नौबहिनी लगायतका स्थानीय तह आगलागीबाट बढि जोखिममा रहेको र हरेक बर्ष ठूलो धनजनको क्षति हुने गरेको हुँदा जनचेतना फैलाउने तथा विपदका घटना व्यवस्थापनमा सहजीकरण गर्ने उद्देश्यले व्यवहारिक अभ्यास सञ्चालन गरिएको कुरा जिल्ला विपद व्यवस्थापन समितिका अध्यक्ष तथा प्रमुख जिल्ला अधिकारी बद्रीनाथ गैह्रेले जानकारी दिनुभयो । ८२ आगलागीका घट्ना आर्थिक बर्ष २०७५/०७६ को वैशाख १५ सम्म प्यूठान जिल्लामा आगलागीका ८२ वटा घटना भएका र उक्त घटनाबाट २ जनाको मृत्यू र करिब २ करोड भन्दा बढीको आर्थिक तथा भौतिक क्षति भएको प्रजिअ गैह्रेले जानकारी दिनुभयो । उहाँले विपदका घटना घटिसकेपछि जतिसक्दो छिटो उद्दारको व्यवस्था मिलाइदै आएको, त्यसका लागि सबै सुरक्षा निकायमा त्तच्त्रक्ष्च्त् को व्यवस्था मिलाइएको, सूचना आदानप्रदानमा स्थानीय तहसँग समन्वय गरिएको, जतिसक्दो छिटो सकेसम्म घटनास्थलमा नै पुगी तत्काल राहत दिने व्यवस्था मिलाईएको जानकारी गराउँनुभयो ।
विपद् न्युनीकरणका लागि स्थानिय तहसंग सहकार्य जिल्लाका झिमरुक तथा माडी नदि आसपासका बस्तिहरु बाढिबाट जोखिममा रहेको साथै नौबहिनी र गौमुखी गाउँपालिकाहरु पहिरोबाट बढी जोखिममा रहेको प्रजिअ गैह्रेले बताउनुभयो । समग्र विपद व्यवस्थापनका लागि स्थानीय तहहरुसँग समन्वय गरी कार्य भइरहेको उहाँले बताउनुभयो । जिल्ला विपद व्यवस्थापन समितिको बैठक नियमित बसी विपद जोखिम न्यूनीकरण, पूर्व तयारी तथा उद्दार एवं राहतका क्षेत्रमा केही प्रगतिहरु भएको र आगामी दिनमा खासगरी पहिरोबाट जोखिम स्थानहरुमा वस्ती स्थानान्तरण गर्नुपर्ने, बाढिको पूर्व चेतावनी प्रणाली स्थापना गर्नुपर्ने, विकास निर्माण गर्दा विपद जोखिम मूल्यांकन गरेर मात्रै गर्नुपर्ने, जनचेतनामूलक कार्यक्रमहरु सञ्चालन गर्नपर्ने, विपदका घटनाको तत्काल उद्दारका लागि सुरक्षाकर्मी पुग्न समय लाग्न सक्ने हुँदा स्थानीयस्तरमा नै विपद प्रतिकार्य दलहरु गठन गरी आवश्यक तालिमको व्यवस्था गर्नुपर्ने लगायतका आवश्यकता रहेको प्रजिअ गैहृेले बताउनुभयो ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
