सुशील बस्नेत
दाङ,१९ भदौ
राप्ती अञ्चल अस्पताल तुलसीपुर परिसरमा निर्माण गरिएको कालिकादेवी स्मृती भवनबाट रक्त सञ्चार सेवा आज सोमबारदेखि सञ्चालनमा आएको छ ।
नेपाल रेडक्रस सोसाईटीले रक्त सञ्चार सेवा सञ्चालन गरेको हो । राप्ती अञ्चल अस्पतालले रक्त सञ्चार सेवा सञ्चालनका लागि आबश्यक स्रोत ब्यबस्थापनका लागि झण्डै डेढ कठ्ठा जग्गा उपलब्ध गराएको छ । कालीकादेवि स्मृती भवन र भवनसगको करिव आधा कठ्ठा जग्गा समेत नेपाल रेडक्रसले रक्त सञ्चार सेवा सञ्चालन गर्नका लागि प्रयोग गर्ने सहमति पछि सेवा आज सोमबारदेखि शुरु भएको हो ।
आफ्नो स्वामीत्वमा रहेको जग्गा मध्येबाट डेढ कठ्ठा जग्गा रक्त सञ्चार सेवा सञ्चालनका लागि राप्ती अञ्चल अस्पताल तलसीपुरले नेपाल रेडक्रस सोसाईटी तुलसीपुरलाई दिन झण्डै ५ बर्ष अघी सहमति भएको थियो ।
जग्गा दिने र लिने सम्बन्धि दुई पक्षबीच सहमति जुट्न नसकेपछि दाता बामदेव उपाध्यायले झण्डै ६० लाख लागतमा आधुनिक भवन निर्माण गर्नुभएको थियो । उक्त भवनबाट रक्त सञ्चार सेवा सञ्चालन गर्नेगरि भवनको २ बर्ष अघि सभामुख ओन्सरी घर्तीले उद्घाटन गर्नुभएको थियो । उद्घाटन गरिएपनि रक्त सञ्चार सेवा भने सञ्चालन हुन सकेको थिएन ।
लामो बिबादका कारण रक्त सञ्चार सेवा सञ्चालन पनि हुन नसक्ने र राप्ती अञ्चल अस्पतालका बिरामीहरु अन्य अस्पतालमा रगतको अभाव र शल्यक्रियाका लागि अन्य अस्पतालमा रिफर हुन बाध्य भएका थिए । बिबाद समाधान गरि रक्त सञ्चार सेवा सञ्चालनका लागि पटक पटक गरिएको पहल असफल भएपछि सबाद समहु क्षेत्रीय सचिबालय तुलसीपुरले लगातार २ महिनाको संबाद प्रक्रियाबाट सहमति जुटाउन सफल भएको छ ।
राप्ती अञ्चल अस्पताल बिकास समितिका अध्यक्ष बिष्णुकुमार देवकोटा,नेपाल रेडक्रस सोसाईटी दाङका अध्यक्ष नारायण आचार्य र भवन निर्माण दाता बामदेव उपाध्याय बिच सहमति जुटे लगतै आज सोमबारदेखि कालिकादेवी स्मृती भवनबाट रक्त सञ्चार सेवा सुरु भएको हो । आज पहिलो दिनमा मात्र झण्डै ४० जनाले रक्त दान समेत गरेका रेडक्रसका अध्यक्ष नारायण आचार्यले जानकारी दिनुभयो ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
