सैघाली खबर,काठमाडौं ,२४ भदौ । निर्वाचन आयोगले प्रदेश नम्बर २ को स्थानीय चुनावका लागि उम्मेदवारलाई शनिबार चुनाव चिन्ह वितरण गर्दैछ । बिहान ११ बजेसम्म उम्मेदवारको अन्तिम नामावली प्रकाशन गरी चुनाव चिन्ह वितरण गर्ने कार्यतालिका रहेको निर्वाचन आयोगका प्रवक्ता नवराज ढकालले जानकारी दिनुभयो ।
चुनाव चिन्ह पाएपछि उम्मेदवारले प्रचारलाई अझै तीब्र बनाउने छन् । अहिले पनि प्रदेश नम्बर २ का ८ जिल्लाका १ सय ३६ वटै स्थानीय तहमा बिहानैदेखि उम्मेदवारले चुनावी प्रचारप्रसारलाई तीब्र बनाएका छन् ।
यसैबिच निर्वाचन आयोगले प्रतिनिधिसभा र प्रदेशसभाको चुनावका लागि कार्यतालिका हेरफेर गर्न समस्या पर्ने जनाएको छ ।
कम मात्र समय रहेको र अझैसम्म पनि कुन प्रदेशमा कति उम्मेदवार र दलले चुनावमा भाग लिने भन्ने टुंगो लागि नसकेकाले आयोगले मोटामोटी रुपमा तयार पारेको निर्वाचन कार्यतालिका हेरफेर गर्न गाह्रो पर्ने प्रवक्ता ढकालले जानकारी दिनुभयो ।
जनक शिक्षा केन्द्रका सीमित मेशिनले मतपत्र छाप्नुपर्ने भएकाले समयमै छाप्न नथाले मतपत्र छापिनसकिने भएकाले त्यसै अनुसार चुनावी कार्यक्रम तय गरिएको पनि प्रवक्ता ढकालले जानकारी दिनुभयो ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
