सैघाली खबर,दाङ ,३१ भदौ। घोराही उपमहानगरपालिकाका मेयर नरुलाल चौधरीले नगर क्षेत्रको शिक्षालाई गुणस्तरीय बनाउन प्रधानाध्यापकहरुलाई नेतृत्वदायी भुमिका खेल्न निर्देशन दिनुभएको छ ।
उपमहागरपालिकाले शुक्रबार घोराहीमा आयोजना गरेको ‘शैक्षिक सुधार तथा विद्यालय व्यवस्थापनका लागि प्रधानाध्यापकहरुलाई अभिमुखिकरण’ मा मेयर चौधरीले विद्यालयको कमजोरी पहिचान गरि सुधार योजना बनाएर शैक्षिक गुणस्तर बढाउन निर्देशन दिनुभएको हो ।
मेयर चौधरीले गुणात्मक शिक्षा कसरी दिने भन्नेमा केन्द्रित हुन र पढाईको ग्यारेण्टी गर्न प्रधानाध्यापकहरुलाई निर्देशन दिनुभयो । घोराही उपमहानगर क्षेत्रमा रहेका ९९ सामुदायिक विद्यालयका प्रधानाध्यापकहरुलाई बोलाई मेयर चौधरीले सामुदायिक विद्यालयमा विद्यार्थीको आकर्षण बढाउन सुझाब दिनुभएको हो ।
निजि विद्यालयको तुलनामा कमजोर भएकै कारण सामुदायिक विद्यालय प्रतिको बिश्वास घट्दै गएको तर्फ संकेत गर्दै उहाँले गुणस्तरीय शिक्षामा शिक्षक, अभिभाबक र सरोकारवालाहरुको मन जित्ने गरी जिम्मेवारी निभाउन प्रधानाध्यापकहरुलाई निर्देशन दिनुभएको हो ।
सामुदायिक विद्यालयहरुको शैक्षिक सुधार कमजोर हुने र बिद्यार्थी बाहिरिने अबस्था आए विद्यालय मर्ज गर्ने चेतावनी दिदै उहाँले केही शिक्षकका कारण बिद्यार्थीको भबिष्य अन्यौलमा पर्ने स्थिती आए उपहानगर नियम अनुसार अघि बढ्ने समेत जानकारी दिनुभयो ।
शिक्षा कमजोर हुदा सामाजिक क्षेत्र नै कमजोर हुने भएकाले शैक्षिक गुणस्तर सुधार्नु नै अहिलेको मुख्य आबस्यकता भएको उल्लेख गर्नुभयो ।
कार्यक्रममा जिल्ला समन्वय समितिका प्रमुख जितेन्द्रमान नेपालीले शैक्षिक जग बलियो भए मात्रै दक्ष जनशक्ति उत्पादन गर्न सकिने बताउनुभयो ।
त्यसैगरी घोराही उपमहानगरपालिकाका कार्यकारी अधिकृत कृष्णप्रसाद सापकोटाले शैक्षिक गुणस्तर सुधार सँगै अनुसाशन र सरसफाईको नेतृत्व गर्न पनि प्रधानाध्यापकहरुलाई आग्रह गर्नुभयो ।
शिक्षा अधिकारी रुद्रप्रसाद रेग्मीले शिक्षकहरुलाई अधिकतम समय विद्यार्थीको सिकाईमा खर्च गर्न निर्देशन दिनुभयो । गुणस्तरीय र व्यवहारीक शिक्षा दिन अग्रसर बन्नु पर्नेमा जोड दिदै कर्मचारीबाट हुने काममा शिक्षकहरुलाई पढाई नछाड्ने उहाँले आग्रह समेत गर्नुभयो ।
कार्यक्रममा स्रोत व्यक्ति विप्लव अधिकारीले उपमहानगरको शैक्षिक अबस्थाका बारेमा जानकारी दिदै ९९ विद्यालयमा ६ सय ८० शिक्षक कार्यरत रहेको र २८ हजार २८ विद्यार्थीहरु रहेको जानकारी दिनुभयो ।
स्रोत व्यक्ति रामप्रसाद जैशीको स्वागत मन्तव्यबाट सुरुभएको कार्यक्रमको सहजिकरण अर्का स्रोत व्यक्ति हुमबहादुर केसीले गर्नुभएको थियो ।