हुम्ला । चीनमा फैलिएको करोना भाइरसले पर्यटकीय चहल पहल ठप्प पारेपछि हुम्लाको हिल्सा क्षेत्रका होटल व्यवसाय बन्द हुने अवस्थामा पुगेका छन् ।मानसरोवर कैलाशका लागि पर्यटकीय रुटका रुपमा पहिचान बनाएको हिल्साका होटेल व्यवसायी पर्यटक आवागमन नै नभएपछि ब्यवसाय बन्द गर्ने अवस्था सृजना भएको बताउँन थालेका हुन् ।
हिउँदे याम जसोतसो गुजारेका ब्यवसायीले आउँदो बैशाखदेखि सुरु हुने सिजन कस्तो रहला भन्ने चिन्ताले समेत सताउन थालेको छ ।हिल्साका होटेल व्यवसायी कर्मा लामाका अनुसार आधा दर्जन पर्यटकीय होटेलसहित असी घरधुरी रहेको हिल्सा बजार अहिले पाँच जना हेरालुको भरमा रहँदै आएको छ ।
हिल्सामा आगामी वैशाखबाट सिजन हुने भए पनि अब के हुन्छ भन्ने चिन्ताले पिरोल्न थालेको लामाले बताए ।हिल्साका होटेलहरुमा वैशाख तेस्रो सातापछि मानसरोवर कैलाशको सिजन शुरु हुने भएपछि भ्याई नभ्याई हुने गरेको थियो । तर, यसपाली भाईरसका कारण के हुने हो यसै भन्न सकिने अवस्था नभएको पर्यटन व्यवसायी रिन्जिन लामाले बताए ।
गत तीन वर्षदेखि हिल्सा नाका हुँदै मानसरोवर कैलाशको यात्रा गर्ने भारतीय पर्यटकको संख्या तीस हजार भन्दा बढी रहेको थियो । मानसरोवर कैलाशको सिजनमा हुम्लामा मात्र १५ करोड रुपैयाँ भन्दा बढी कमाई हुने गरेको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
