काठमाडौं । बेलायती प्रधानमन्त्री बोरिस जोन्सनले त्यहाँ दोस्रो चरणको लकडाउन गर्ने तयारी गरेका छन् । पछिल्ला दिनहरुमा कोरोना भाइरस संक्रमण दर तीव्र रुपमा वृद्धि हुँदै गएपछि सरकारले बेलायतमा एक महिना लामो राष्ट्रव्यापी लकडाउन घोषणा गर्ने तयारी गरेको हो । क्रिसमसको समयमा लकडाउन खुकुलो पार्ने गरि आगामी सोमबार प्रधानमन्त्रीले लकडाउनको घोषणा गर्ने बताइएको छ ।
गएराती बीबीसीले प्राप्त गरेको एक गोप्य दस्तावेज अनुसार अघिल्लो पटकको तुलनामा यसपटक चार गुणा बढी मानिसहरुको मृत्यु हुन सक्ने उल्लेख छ । दस्तावेजका अनुसार बेलायतमा दैनिक ४ हजार मानिसहरुको मृत्यु हुने बताइएको छ । जबकि यसअघि एक दिनमा एक हजारसम्म मानिसको मृत्यु भएको थियो । आज साँझ प्रधानमन्त्री बोरिस जोन्सन, बेलायका चीफ मेडिकल अफिसर क्रिस विट्टी तथा सरकारका चीफ साइन्टिफिक एड्भाइजर सर प्याट्रिक भ्यालेन्सबीच छलफल हुने भएको छ ।
दोस्रो चरणको लकडाउनले विशेषगरि व्यापारिक क्षेत्रमा नराम्रो असर पार्ने बताइएको छ । तर स्कुल कलेज र विश्वविद्यालयमा नयाँ नियम लागू नहुने बताइए पनि यसको आधिकारिक पुष्टि हुन बाँकी नै छ । पछिल्लो समयमा कोरोना संक्रमितको संख्या, मृतकको संख्या र हस्पिटल भर्ना हुनेको संख्या अत्यधिक बढ्न थालेपछि सरकार राष्ट्रिय लकडाउनको तयारीमा जुटेको हो ।
यसअघि भने सरकारले राष्ट्रिय लकडाउन नगरिने बताउँदै आएको थियो । युरोपका बेल्जियम, फ्रान्स र जर्मनीमा लकडाउन घोषणा भएपछि सोही महादेशको सबैभन्दा बढी प्रभावित ब्रिटेनले संक्रमण नियन्त्रणको लकडाउनको विकल्प रोज्न लागेको हो । सरकारको प्यान्डामिक मोडलिङ ग्रुप ‘एसपीआइ एम’ ले तयार पारेको दस्तावेज प्रधानमन्त्रीले हेरिसकेको बताइएको छ ।
वैज्ञानिक सल्लाहकारहरुको समूह सेज ग्रुपले जाडो यामका बेला कम्तीमा ८५ हजार मानिस मर्न सक्ने बताएका छन् । हिजो शुक्रबार मात्र बेलायतमा २४ घण्टाभित्र २७४ जनाको मृत्यु भएको थियो भने २४ हजारभन्दा बढी नयाँ संक्रमित थपिएका थिए । शुक्रबार सार्वजनिक तथ्यांकअनुसार बेलायतमा हालसम्म कोरोना संक्रमणका कारण ४६ हजारभन्दा बढीको मृत्यु भैसकेको छ भने संक्रमित संख्या करिब दश लाख पुगेको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
