भालुवाङ । लुम्बिनी प्रदेशसभाका सभामुख पूर्णबहादुर घर्तीले निर्माणाधीन प्रदेशसभाको आज बिहान निरीक्षण गरेका छन् । लुम्बिनी प्रदेशको स्थायी राजधानी राप्ती उपत्यकाको राप्ती गाउँपालिका—३ स्थित राप्ती प्राविधिक शिक्षालयमा बन्दै गरेको प्रदेशसभा भवनको निरीक्षण गरेका छन् । सभा हलको निरीक्षण गर्दै सभामुख घर्तीले अहिलेको हिउँदे अधिवेशन ढिलै भए पनि स्थायी राजधानीमै हुने विश्वास व्यक्त गरेका छन् ।
उनले पछिल्लो समय सभा हलको निर्माणले गति लिएकोमा खुसी समेत व्यक्त गरे । दाङ देउखुरीको राप्ती गाउँपालिका वडा नम्बर ३ को राप्ती प्राविधिक शिक्षालय मौरी घाटमा सभा हल निर्माण कार्य धमाधम सुरु भएको छ । २३ औँ दिनमा सम्म ५० प्रतिशत काम पुरा भएको र निधारित समयमै प्रदेशसभाको भवन निर्माण कार्य सम्पन्न गरी प्रदेश सरकारलाई हस्तान्तरण गरिने प्रदेश पुर्वधार प्राधिकरणका कार्यकारी अधिकृत अनन्तराज घिमिरेले बताए ।
हाल प्रदेशसभा भवन निमांणमा माटो फिलिङको काम सम्पन्न गरी पिलर खडा गर्ने र इँटा जडानको काम तीव्र गतिले अगाडी बढेको छ । राती र दिउँसो गरी २ सिफ्टमा कामदार खटाएर निमाणर्को काम सुरु गरिएको छ प्राधिकरणले जनाएको छ । प्रदेश सरकारले स्थायी राजधानी राप्ती उपत्यका देउखुरीमा ५ करोड २१ लाखको लागतमा निर्माण गर्न थालेको छ । अहिले सम्म प्रदेशसभाको बैठक अस्थायी मुकाम बुटवलमा बस्दै आएको छ । राजधानी तोकिएको एक वर्ष पुगिसकेको छ ।
प्रदेश सरकारले राजधानी कार्यान्वयनको लागि गम्भीर रहेको जनाउँदै अब आह्वान गरिने हिउँदे अधिवेशन स्थायी राजधानीमै बोलाउने तयारी गर्नु आफैमा सकारात्मक विषय हो । प्रदेशसभा भवनलाई विशेष रूपमा सिङारिने र सोही भवनबाट प्रदेशसभाको बैठक सञ्चालन गर्ने योजना छ । सत्ता पक्ष दलका नेता र प्रतिपक्ष दलका नेतालाई आमने सामने राखेर बैठक सञ्चालनको नयाँ अभ्यास नेपालमै पहिलो पटक लुम्बिनी प्रदेशबाट गरिने भएको छ ।
अनुगमनमा लुम्बिनी प्रदेशसभाका सभामुख पूर्णबहादुर घती, प्रदेशसभाका सचिव दुर्लभ घर्ती प्रदेश पुर्वधार प्राधिकरणका कार्यकारी अधिकृत अनन्तराज घिमिरे, प्राधिकरणका आर्तिटेक इन्जिनियर वासुदेव अधिकारी र सञ्चारकर्मी लगायतको सहभागिता रहेको थियो ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
