कर्णाली प्रदेशका उद्योग, पर्यटन तथा वन मन्त्री नन्दसिंह बुढाका स्वकीय सचिव डम्वर बुढाले मन्त्रालयका सचिव विद्यानाथ झामाथि हातपात प्रयास गरेका छन् ।
तत्कालिन एमालेबाट मन्त्री भएका बुढाका स्वकीय सचिव डम्बर बुधबार मदिरा सेवन गरि मन्त्रालय पुगेका मन्त्रालयका सचिवमाथि हातपात गरेका हुन् ।
हातपातका क्रममा उनीसँगै जगत सिंह, हरिप्रसाद तिवारीलगायतका युवाहरु पनि सँगै थिए । उनीहरुले सचिवमाथि कार्यकक्षमै हातपात प्रयास गरेका थिए । प्रहरीले तीनै जनालाई पक्राउ गरेको तर केही समयपछि छोडेको थियो ।
सचिव झाले मन्त्रीका स्वकीय सचिव बुढासहितका केही युवाहरुले मदिरा सेवन गरेर आफूमाथि हातपात गर्न खोजेको बताए । सुरक्षाकर्मीले बाहिरबाट ढोका बन्द गरेका कारण ठूलो घटना हुन नपाएको सचिव झाले बताए ।
बैशाख १ गते कर्णाली प्रदेश सरकारले मुगुको रारातालबाट सुरु गरेको कर्णाली–रारा पर्यटन वर्ष उद्घाटनका आफ्नो व्यक्तिगत रकम खर्च भएको भन्दै स्वकीय सचिव बुढाले सचिव झासँग रकम मागेको बताइएको छ ।
तर, सचिव झाले कमिसन तथा अनियमित रकम दिन नमिल्ने भनेका थिए । सचिवको जवाफ सुनेपछि बुढाको नेतृत्वमा तीनै जनाले आफूमाथि आक्रमण गर्न खोजेको झाको भनाई छ ।
सचिव झाले आफूमाथि हातपात भएको जानकारी गराएपछि प्रहरी टोली पठाएको जिल्ला पहरी कार्यालय सुर्खेतले बताएको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
