सैघाली खबर
काठमाडौं,२९ असोज
संघीय लोकतान्त्रिक नेपालको संविधान जारीपछि संविधान सभाबाट रुपान्तरित व्यवस्थापिका–संसद्को कार्यकाल सकिए सँगै संक्रमण कालीन व्यवस्था पनि टुङ्गिने चरणमा पुगेको छ । आगामी मंसिर १० र २१ को प्रतिनिधि सभा र प्रदेश सभाको निर्वाचनका लागि समानुपातिक तर्फका उम्मेदवारको मनोनयन हुने अघिल्लो गएराति देखि संसद्को अवधि समाप्त भएको छ ।
वि.सं २०७० मंसिर ४ मा भएको दोस्रो संविधानसभाको निर्वाचनबाट निर्वाचित ६०१ सदस्यीय संविधानसभा २०७२ असोज ३ मा नेपालको संविधान जारीपछि व्यवस्थापिका–संसद्मा रुपान्तरण भएको थियो । हाल संसद्मा ५९३ सदस्य कायम थिए ।
आगामी मंसिरमा हुने प्रतिनिधि सभा र प्रदेश सभाको निर्वाचन सँगै मुलुकमा संक्रमणकालको अन्त्य हुनेछ । यो संसद्को कार्यकाल आगामी माघ ७ गतेसम्म भए पनि मंसिरमा निर्वाचन तय भएको र मनोनयनको मिति असोज २९ बाट शुरु हुने भएकाले संविधानको व्यवस्था अनुसार हिजो कार्यकाल सकिएको हो । संसद्को कार्यकालभरिमा ६६६ दिन बैठक बसेको र यसबीचमा ५६ विधेयक पारित भएका थिए ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
