निमु सगंम घर्ती,
घोराही, १५ कार्तिक।
दाङमा दोस्रो चरणमा ८२ जना मुक्त कमलरी बालिकाहरुले परिचय पत्र पाउने भएका छन् । मुक्त कमलरी परिचय पत्र वितरण जिल्ला समितिको आज घोराहीमा बसेको बैठकले मन्त्रालयबाट प्राप्त ८२ जना मुक्त कमलरी बालिकाहरुको नामलाई अनुमोदन गरेको हो ।
जिल्ला भुमि सुधार कार्यालयका निमित्त प्रमुख मानवहादुर कवरको अध्यक्षतामा बसेको बैठकले दोस्रो चरणमा विभिन्न गाउँपालिकाका ८२ जना मुक्त कमलरी बालिकालाई परिचय पत्र दिने निर्णय गरेको हो ।
यस अघि स्थानिय तहहरुबाट भुमी सुधार कार्यालय मार्फत मन्त्रालयमा पठाईएका नामहरुलाई अनुमोदनका लागि फेरी जिल्लामा पठाएपछि आज बैठकले प्रमाणिकरण गरेको हो । भुमि सुधार कार्यालयले केही दिनमा ति मुक्त कमलरीहरुलाई परिचय पत्र बितरण गर्ने लेखा अधिकृत नारायणप्रसाद पोख्रेलले जानकारी दिनुभयो ।
कार्यक्रममा घोराही उपमहानगरपालिकाका प्रमुख नरुलाल चौधरीले सरकारले मुक्त कमलरीहरुलाई परिचय पत्र दिएर न्याय गरेको बताउनुभयो । बास्तबिक मुक्त कमलरीले परिचय पत्र पाउनुपर्ने भन्दै उहाँले परिचय पत्र प्राप्तका लागि आबस्यक सिफारीसमा निशुल्क सेवा प्रदान गरिएको जानकारी समेत दिनुभयो ।
यस अघि दाङमा १० जना मुक्त कमलरीले परिचय पत्र पाएका छन् । भुमि सुधार मन्त्रालयमा दाङका २९ सय ४५ जना मुक्त कमलरीको नामावली रहेको छ भने मुक्त कमलरी विकास मञ्चको तथ्यांकमा ४६ सय ७७ जनाको नाम रहेको र छुटेकाको छिट्टै पठाईने पूर्ब कमलरी उर्मिला चौधरीले जानकारी दिनुभयो ।।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
