काठमाडौं । सिन्धुपाल्चोकको बाह्रबिसेमा आएको बाढीले करिब एक दर्जन घर बगाएको छ । बाढीमा परी कम्तिमा २० जना मानिस बेपत्ता छन् । जिल्लामा रहेका जलविद्युत आयोजनाहरुमा पनि बाढीले क्षति पुर्याएको छ ।
जिल्ला प्रहरी कार्यालय सिन्धुपाल्चोकका प्रमुख एसपी प्रज्ज्वल महर्जनले जम्बु र भोटेकोशी गाउँपालिकामा क्षति भएको जानकारी आएकाले टोली परिचालन गरिएको बताएका छन् ।
बाह्रबिसे नगरपालिकाका मेयर निमफुन्जो शेर्पाले बाह्रबिसे नगरपालिका वडा नं। ३ को इलाका प्रहरी कार्यालय बाह्रबिसे नजिकै अरनिको राजमार्गको एउटा साइड नै बगाएको बताए । बाह्रबिसे नपाको जम्बु बजारनै बगेको स्थानीयको भनाइ छ ।
बाढीले यस्तै खगदल भन्ने ठाउँमा पक्की पुल बगाएको र सो स्थानमा करिब १२ वटा घर बगाएको मेयर शेर्पाले मकालु खबरसँगको कुराकानीमा भने । यसैगरी सोहि क्षेत्रको आधा किलोमिटर अगाडि वडा नं। ५ र ८ को बीचमा पनि केही घरहरु बाढीले बगाएको जानकारीमा आएको मेयरले बताए ।
यता भोटेकोशी गाउँपालिकाका अध्यक्ष राजकुमार पौडेलले बर्कुटे भन्ने स्थानमा एकै घरका ४ जना परिवार वेपत्ता भएको जानकारी दिए । उनीहरुको खोजीका लागि जिल्ला प्रहरी कार्यालयबाट टोली बोलाइएको छ । डाडे खोलाको पुल पनि बाढीले बगाएको छ ।
एउटा घरको दुई बालबालिकाहरु घाइते भएको खबर आएकोले उनीहरुको उद्दारका लागि हेलिकप्टर पठाउने तयारी भइरहेको पौडेलले बताए । बाह्रबिसेको जुरेदेखि नै बाटो अबरुद्ध भएकाले उद्धारमा कठिनाइ भएको छ । यता जल तथा मौसम विज्ञान विभागले चार दिन मुलुकभर यो वर्षकै ठूलो वर्षा हुने बताइरहेको बेला त्यता भने यस्तो बाढि आएको हो । देशका केही स्थानमा आज भारी वर्षाको सम्भावना रहेकाले बाढी, पहिरो तथा डुवानबाट सचेत रहन सरकारले आग्रह गरेको छ ।
आज सातवटै प्रदेशका केही स्थानमा भारी वर्षाको सम्भावना रहेकाले उक्त प्रदेशका नदीहरुमा पानीको बहाव बढ्ने, पहाडी क्षेत्रमा भू९क्षय हुने, पहिरो जाने, सडक तथा हवाई यातायात सेवा प्रभावित हुने तथा ढल र पानीको राम्रो निकास नभएको ठाउँमा डुबानसमेत हुन सक्ने भएकोले आवश्यक सतर्कता अपनाउन जल तथा मौसम विज्ञान विभागले जनाएको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
