काठमाण्डौँ, असार ३१
मुलुकभरको ७ सय ५३ स्थानीय निकायहरुमध्ये मकवानपुरको थाहा नगरपालिका उत्कृष्ट भएको छ । आर्थिक वर्ष २०७४/७५ को बेरुजु अंकको ९६ दशमलब ०६ प्रतिशत फछ्र्यौट गरेकोमा आर्थिक सुशासन कायम गरेकोमा संघीय मामिला तथा सामान्य प्रशासन मन्त्रालयले पुरस्कृत गरेको समेत गरेको छ ।
पुरस्कृत हुने स्थानीय निकायमा थाहा नगरपालिका एक मात्र स्थानीय निकाय हो । हिजो (असार ३० गते) नेपाल सरकार सचिवस्तरको निर्णयले बेरुजु फछ्र्यौट कार्ययोजना र मार्ग निर्देशिका अनुसार काम गरेकोमा सो नगरपालिकाका कर्मचारीहरुलाई प्रशंसा–पत्र सहित पुरस्कृत गरेको छ ।
महालेखा परीक्षकको कार्यालयको अन्तिम लेखा परीक्षणमा ४ प्रतिशत भन्दा कम बेरुजु हुने कार्यालयमा आर्थिक अनुशासन राम्रो भएको मानिन्छ । थाहा नगरपालिकाले आर्थिक वर्ष २०७५/७६ मा बेरुजु जम्मा २ दशमलब ५४ प्रतिशत मात्र कायम गरेको छ ।
थाहा नगरपालिकाको आर्थिक वर्ष २०७४/७४ सम्मको नियमित गर्नुपर्ने १४ लाख ७१ हजार, असुल गर्नुपर्ने ६४ लाख ४ हजार र पेश्की ७६ लाख ८९ हजार गरी जम्मा १ करोड ५५ लाख ६५ हजार पेश्की बाँकी भएकोमा नियमित गर्नुपर्ने १४ लाख ७१ हजार, असुल गर्ने ६० लाख १३ हजार र पेश्की फछ्र्यौट ७४ लाख ६७ हजार गरी कुल १ करोड ४९ लाख ५२ हजार बेरुजु फछ्र्यौट भएको प्रमुख प्रशासकीय अधिकृत हरिलाल पुरीले बताएका छन् ।
मन्त्रालयले नगरपालिकामा आर्थिक अनुशासन कायम गर्न सफल भएकोमा प्रमुख प्रशासकीय अधिकृत हरिलाल पुरी र लेखा अधिकृत विष्णु भुसाललाई जनही ५ हजार रुपैयाँ पुरस्कार र सम्मान पत्र प्रदान गरेको छ ।
आफ्नो नगरपालिका उत्कृष्ट भई पुरस्कृत भएकोमा नगरप्रमुख लवशेर विष्टले यस कार्यमा उल्लेखनीय योगदान पु-याउनुहुने कर्मचारी, स्थानीय नागरिक, सञ्चारजगत, राजनैतिक दल सहित सबैमा आभार व्यक्त गरेका छन् ।
देशका सबै स्थानीय निकायहरुमा थाहा नगरपालिका अघिल्लो आर्थिक बर्ष चौथो भएको थियो ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
