एजेन्सी। दिल्लीका विद्यालय खोप नआउँदासम्म बन्द गरिने भएको छ। भारतको केन्द्रीय राजधानी रहेको दिल्ली राज्यमा कोभिड–१९ विरुद्धको खोप नआउँदासम्म विद्यालय बन्द गरिने भएको हो।
खोप नआउँदासम्म बालबालिकाहरू विद्यालयमा सुरक्षित हुन नसक्ने भएकाले अहिले नै विद्यालय खोल्न ठीक नहुने निष्कर्ष राज्य सरकारले निकालेको छ। जहिलेसम्म खोप आउँदैन त्यसबेलासम्म दिल्लीका विद्यालयहरू बन्द गरिने दिल्लीका उपमुख्यमन्त्री तथा शिक्षामन्त्री मनीष सिसोडियाले बताए।
कोभिड–१९ विरुद्धको खोप नआउँदै विद्यालय खोल्नु घातक हुने भएकाले विद्यालय खोल्ने निर्णय गर्न नसकिएको उनले बताए। दिल्ली राज्यमा गत मार्च १६ देखि सबै विद्यालय बन्द छन्। कोभिड–१९ को महामारी पुनः फैलिन थालेपछि सरकारले विद्यालय बन्द गराएको हो। भारतका कतिपय राज्यहरूले विद्यालय खोल्ने निर्णय गरे पनि दिल्ली राज्यले भने बन्दलाई अझै कायमै राख्ने निर्णय गरेको छ।
तुलनात्मक रूपमा कोभिडबाट बढी प्रभावित राज्य भएकाले पनि दिल्ली सरकारले विद्यालय खोल्ने जोखिम नलिएको हो । नयाँदिल्लीमा मात्रै बुधबार साँझसम्म ५ लाख ४० हजार ५ सय ४१ जना कोभिड–१९ बाट संक्रमित भइसकेका छन् । ८ हजार ६ सय २१ जनाको मृत्यु भइसकेको छ। भारतको केन्द्रीय स्वास्थ्य तथा परिवार कल्याण मन्त्रालयले बुधबार दिएको जानकारीअनुसार भारतमा कोभिड–१९ संक्रमितको संख्या ९२ लाख २२ हजार २ सय १६ पुगेको छ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
