सैघाली खबर
काठमाडौं,१० बैशाख
अखिल नेपाल फुटबल संघ एन्फाको निर्वाचन समितिले यही वैशाख २२ गते शनिबार निर्वाचन गर्न प्रस्ताव गरेको छ । एन्फाको निर्वाचन समितिले हिजो चुनावको मिति प्रस्ताव गरेको हो । तर उक्त मितिमा चुनाव हुन उच्च अदालत पाटनले एन्फाको चुनाव रोक्न दिएको अन्तरिम आदेश खारेज हुनुपर्नेछ ।
यदि उच्च अदालतले यसअघिकै आदेशलाई निरन्तरता दिएको अवस्थामा भने वैशाख २२ गते निर्वाचन गर्न नसकिने निर्वाचन समितिले जनाएको छ । यसअघि गत चैत १४ गतेका लागि तय भएको चुनाव उच्च अदालतको पाटनको आदेशका कारण रोकिएको थियो ।
भक्तपुर र मकवानपुर जिल्ला फुटबल संघले दायर गरेको रिटमा उच्च अदालतका न्यायाधीश राजकुमार वनको इजलासले चुनाव रोक्न आदेश दिएको थियो । त्यसपछि यी दुई जिल्ला फुटबल संघको चुनाव गरिएको र मुद्दा पनि फिर्ता भएका कारण निर्वाचन समितिले चुनावको नयाँ मिति तोकेको हो ।
एसियन फुटबल महासंघ एएफसीले चुनाव मिति जतिसक्दो चाँडो तोक्न एन्फालाई यसअघि नै निर्देशन दिएको थियो । एन्फाको नयाँ नेतृत्वका लागि वरिष्ठ उपाध्यक्ष मणि कुँवर र पूर्व उपाध्यक्ष कर्माछिरिङ शेर्पा पक्षबीच प्रतिस्पर्धा हुँदैछ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
