साउदी अरबमा भ्रष्टाचारविरुद्धको कारबाहीको आलोचना गरेको आरोपमा पक्राउ परेका राजकुमार खालिद बिन तलाल रिहा भएका छन् ।करिब एक वर्षअघि नियन्त्रणमा लिइएका राजकुमार खालिद साउदी राजा सलमानका भतिजा हुन् । भ्रष्टाचारविरुद्धको कारबाहीकाक्रममा खालिदका दाजु राजकुमार अलवालीद बिन तलालसहित दर्जनौं राजकुमार तथा अरू शक्तिशाली व्यक्तिहरू पक्राउ परेका थिए ।
साउदी पत्रकार जमाल खशोग्जीको हत्या प्रकरणलाई लिएर साउदी युवराज मोहम्मद बिन सलमानमाथि दबाब बढिरहेका बेला खालिद रिहा भएका हुन् । विश्लेषकहरुले साउदी अधिकारीहरू राजपरिवारभित्रबाट समर्थन बढाएर अहिलेको संकट निवारण गर्न चाहेको देखिने बताएका छन् ।
साउदी सरकारले राजकुमार खालिदलाई पक्राउ र रिहा गर्नुबारे कुनै औपचारिक जानकारी दिएको छैन । तर, ‘वाल स्ट्रीट जर्नल’काअनुसार गत वर्ष २०० भन्दा बढी राजकुमार, मन्त्री तथा व्यापारीहरूलाई भ्रष्टाचारको आरोपमा पक्राउ गरिएकामा खालिदले त्यसको आलोचना गरेका कारण नियन्त्रणमा राखिएको हो ।
उनीहरु सबैलाई राजधानी रियादस्थित पाँचतारे रिट्ज कार्लटनसहितका होटलमा राखिएको थियो । गत जनवरीको अन्त्यमा भ्रष्टाचारविरुद्ध कारबाही सुरू भएलगत्तै साउदी महान्यायाधिवक्ताको कार्यालयले १०० अर्ब डलरभन्दा बढी रकम बराबरको संगठित भ्रष्टाचार भएको जनाएको थियो ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।