मोटरसाइकलको ठक्करबाट एकजनाको मृत्यु भएको छ। मृत्यु हुनेमा पाल्पा बगनाशकाली ५ दर्लमडाँडाका ४७ वर्षीय टेकबहादुर खाम्चा रहेको जिल्ला प्रहरी कार्यालय पाल्पाले जनाएको छ। माथागढी तीन सराइबाट बाँसटारीतर्फ आउँदै गरेको लु ४ प ९०४८ नम्बरको मोटरसाइकलले मदन पोखराको दमकडामा बुधबार साँझ खाम्चालाई ठक्कर दिएको थियो।
गम्भीर घाइते खाम्चाको लुम्विनी मेडिकल कलेज प्रभारसमा उपचारको क्रममा बिहीबार बिहान मृत्यु भएको प्रहरी उपरीक्षक विश्वमणि पोख्रेलले बताए। सडक छेउमा हिड्दै गरेका खाम्चालाई मोटरसाइकलले ठक्कर दिएको थियो। मोटरसाइकल चालकलाई प्रहरीले नियन्त्रणमा लिएर अनुसन्धान थालेको उनले बताए। त्यसैगरी करेण्ट लागेर एकजना घाइते भएका छन् ।
बिहीबार बिहान तानसेनको बसपार्कमा घरको वायरिङ गर्ने क्रममा करेण्ट लागेर नवलपरासीको सरावल गाउँपालिका ४ का २० वर्षीय नेमराज हरिजन घाइते भएको प्रहरीले जनाएको छ। उनको युनाइटेड मिशन अस्पतालमा उपचार भइरहेको छ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
