सैघाली खबर
काठमाडौं साउन, १८
भरतपुर महानगरपालिका वडा नम्बर १९ को पर्सी हुने मतदानका लागि आजदेखि तयारी सुरु भएको छ । उम्मेदवारहरुले आजदेखि नै प्रचारप्रसार गर्न नपाउने भएका छन् । भरतपुर महानगरपालिकाका मुख्य निर्वाचन अधिकृत कविप्रसाद न्यौपानेको कार्यालयमा हिजो अपराह्न भएको सर्वदलीय बैठकपछि मतदानको मिति तय गरिएको हो । मुख्य निर्वाचन अधिकृत न्यौपानेसहितको टोलीले निर्वाचन हुने वडा नम्बर १९ को वस्तुस्थिति बुझ्न स्थलगत अनुगमन गरेको थियो । मतदानको मिति तय हुँदै गर्दा उता राजनीतिक दलहरू रातारात चुनावी प्रचारप्रसारमा जुटेका छन् । पुनः मतदान गर्न सर्वोच्चले निर्णय गरेसँगै राजनीतिक दलहरूले आफ्ना उम्मेदवारले जित्ने रणनीति बनाउन आन्तरिक गृहकार्य थालेका छन् । भरतपुर महानगरमा २७ वटा वडाको मतगणना भइसकेको छ । अब निर्वाचन हुन बाँकी वडा नम्बर १९ र गन्न बाँकी रहेको वडा नम्बर २० को गणना हुनेछ । २७ वटा वडाको अन्तिम नतिजाअनुसार एमालेका मेयरका उम्मेदवार देवी ज्ञवालीले ४० हजार ९८० मत ल्याउनु भएको छ भने माओवादी–कांग्रेस गठबन्धनकी उम्मेदवार रेणु दाहालको ४० हजार १९४ मत छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
