सुर्तीमा ४ हजार किसिमका स्वास्थ्यलाई असर गर्ने रासायनिक पदार्थहरु हुन्छन् । ती मध्ये ४५ किसिमका रसायनहरुले क्यान्सरको विकास गराउँछ ।
धुम्रपान गर्ने व्यक्तिलाई दम,खोकी, ब्रोङ्काइटिस र क्यान्सर हुने जोखिम उच्च हुन्छ । तपाईलाई जानकारी नै होला धुम्रपान गर्ने व्यक्तिलाई फोक्सो,पेट फियो, मुत्रनली र पाठेघरको क्यान्सर हुने जोखिम बढी हुन्छ ।
त्यतिमात्र होइन धुम्रपान गर्ने व्यक्तिमा मुटु रोग, मस्तिष्कमा रक्तश्राव हुने, गर्भको बच्चा कमजोर हुने र काम गर्ने क्षमतामा समेत कमी हुने समस्याहरु देखिन्छ ।
तपाईले धुम्रपान गर्नुहुन्न भने यी रोग लाग्ने सम्भावना कम छ भनेर सोच्दै हुनुहुन्छ होला । तर तपाईलाई थाहा छ ? धुम्रपान नगर्दैमा यी रोगको जोखिमबाट मुक्त हुन सकिँदैन । यदि तपाई धुम्रपान गरिरहेको व्यक्तिको नजिक बस्नुहुन्छ भने तपाईलाई पनि यी रोगहरु लाग्ने सम्भावना अधिक हुन्छ ।
धेरै समय धुम्रपान गर्ने व्यक्तिको नजिक रहेका महिनाहरुमा क्यान्सर हुने सम्भावना २० देखि ३० प्रतिशत रहन्छ । अर्थात तपाईले धुम्रपान गर्नुहुन्न, तर तपाई धुम्रपान गरिरहेको मानिसहरुसँगै उनीहरुले उडाएको चुरोटको धुँवाको नजिक नियमित बस्दा त्यसको असर तपाईलाई पनि पर्छ ।
यस्तै गर्भवती वा स्तनपान गराउने महिलाले धुम्रपान गर्दा उसको बच्चालाई दम, खोकी, कानको संक्रमण, क्यान्सर, निमोनिया र ब्रोङ्काइटिस हुने समस्या प्रवल मात्रामा देखिन्छ ।
धुम्रपानले धुम्रपान गर्ने व्यक्तिको स्वास्थ्यमा मात्र होइन, त्यसका वरिपरि रहेका धुम्रपान नगर्ने व्यक्तिलाई पनि असर परिरहेको हुन्छ ।
धुम्रपान गर्ने आमाबाबुको बच्चालाई धुम्रपान नगर्ने व्यक्तिको बच्चा भन्दा निमोनिया हुने सम्भावना दोब्बर रहने अध्ययनले देखाएको छ ।
आमा, बुबाले धुम्रपान गर्दा नवजात शिशुलाई घाँटी दुख्ने, खोकी लाग्ने, स्वास्थ्य जन्मिएको बच्चा पनि रोगी हुने र अकालमा मृत्यु हुनसक्ने जोखिम रहन्छ ।
स्तनपान गराइरहेकी आमाको दुधमा विषालु रासायनहरु हुन्छन् । जसले शिशुको स्वास्थ्यलाई असर पुर्याउँछ ।
धुम्रपान छोड्दा हुने फाइदा यस्तो छ
–फोक्सोको दम, खोकी, ब्रोङ्काइटिस, क्यान्सर, मुटुरोग, टिबी रोग लाग्नबाट बच्न सकिन्छ,
–मुखको क्यान्सर लाग्नबाट बच्न सकिन्छ,
–गर्भ नतुहिने र जन्मिएका शिशु स्वास्थ्य हुने गर्छन्,
–धुम्रपान नगर्दा दाँत, औला पहेंला हुँदैनन्,
–बच्चालाई निमोनिया कम हुन्छ,
–पैसाको बचत हुन्छ,
–छोराछोरीले धुम्रपान गर्न सिक्दैनन्,
–धुम्रपान नगर्दा आसपासका अन्य व्यक्तिलाई पनि असर हुँदैन ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
